گورنر بھگت سنگھ کوشیاری نے خط کے ذریعے ادھو ٹھاکرے سے ریاست میں عبادت گاہوں کو دوبارہ کھولنے کا اعلان کرنے کی اپیل کی تھی۔
بھگت سنگھ کوشیاری نے اپنے خط میں لکھا کہ 'آپ نے یکم جون کو 'مشن بگن اگین' شروع کیا تھا لیکن اب اس کو چار مہینے ہوچکے ہیں اور ابھی مذہبی مقامات نہیں کھلے ہیں جبکہ کورونا وائرس کے بڑھتے معاملات کے باوجود بھی قومی دارالحکومت دہلی میں مذہبی مقامات کھولنے کی اجازت دی جا چکی ہے۔
انہوں نے مزید لکھا کہ "مجھے حیرت ہے کہ آپ مذہبی مقامات کو کھلنے میں کیوں تاخیر کر رہے ہیں یہ ستم ظریفی ہے کہ ایک جانب حکومت نے سنیما ہال اور ریستوراں کھولنے کی اجازت دے دی ہے لیکن دوسری جانب دیوی دیوتاؤں کا مقام نہیں کھولا گیا۔
کوشیاری نے لکھا کہ 'آپ ہندوتوا کے مضبوط حامی ہیں۔ آپ نے بھگوان رام کے لئے سرعام اپنی عقیدت کا اظہار کیا۔ گورنر نے سوالیہ لہجے میں ادھو ٹھاکرے کو لکھا کہ 'کیا آپ اچانک سیکولر ہوگئے ہیں؟
گورنر کے اس خط کا جواب دیتے ہوئے ادھو ٹھاکرے نے کہا کہ ان کے ہندوتوا کو کوشیاری سے تصدیق کی ضرورت نہیں ہے۔چونکہ اچانک لاک ڈاؤن نافذ کرنا ٹھیک نہیں تھا اس لیے اسے فوری طور پر منسوخ کرنا بھی اچھی بات نہیں ہوگی۔ اور ہاں ، میں وہ شخص ہوں جو ہندوتوا کی پیروی کرتا ہوں، میرے ہندوتوا کو آپ سے تصدیق کی ضرورت نہیں ہے۔
گورنر کے خط میں مختلف گروپس کے نمائندوں کی جانب سے موصولہ باتوں کو بھی شامل کیا گیا تھا جس میں مندروں اور دیگر عبادت گاہوں کو دوبارہ کھولنے کا مطالبہ کیا گیا تھا۔
گورنر اور وزیر اعلی کے مابین یہ لفظی جنگ ایک ایسے وقت میں ہورہی ہے جب بھارتیہ جنتا پارٹی عقیدت مندوں کے لیے مندروں کو دوبارہ کھولنے کا مطالبہ کرتے ہوئے ریاست بھر میں مظاہرے کررہی ہے۔
اس سے قبل ممبئی میں سدھی ونایک مندر کے باہر احتجاج کے دوران بی جے پی رہنما پرساد لاڈ کو پارٹی کے دیگر کارکنان کے ساتھ پولیس نے حراست میں لیا تھا۔
