مہاراشٹر میں جاری سیاسی گہما گہمی کے درمیان گزشتہ کئی روز سے مسلسل جاری این سی پی اور کانگریس کی میٹنگ اپنے اختتام کو پہنچ گئی ہے۔
اس میٹنگ کے بعد ایک پریس کانفرنس کے ذریعے ریاست کے سابق وزیراعلی و کانگریس رہنما پرتھوی راج چوہان نے اعلان کیا ہے کہ 'تمام باتیں امید افزا رہیں ، ہم مہاراشٹر میں ایک مستحکم حکومت قائم کریں گے'۔
اس معاملے میں کانگریس رہنما کا مزید کہنا ہے کہ 'چند باتوں کے تعلق سے بات چیت ابھی بھی جاری ہے جو ایک یا دو دنوں میں مکمل ہوجائے گی'۔
پریس کانفرنس میں موجود رکن پارلیمان و این سی پی رہنما نواب ملک کا کہنا ہے کہ' ہم نے تمام نقطوں پر بات چیت کی ہے'۔
واضح رہے کہ اس سے قبل زیراعظم نریندر مودی اور این سی پی صدر شرد پوار کے درمیان ہوئی ملاقات کے بعد کئی قسم کی قیاس آرائیاں کی جارہی تھیں لیکن اب مہاراشٹر میں حکومت سازی کے راستے صاف ہوتے نظر آرہے ہیں۔
اس تعلق سے کانگریس کے اعلی رہنماؤں نے شیوسینا اور این سی پی دونوں پارٹیوں کے ساتھ الگ الگ ملاقات کی تھی۔
خیال رہے کہ شیوسینا نے مہاراشٹر میں ہوےت اسمبلی انتخابات کے بعد اپنی اتحادی پارٹی بی جے پی سے علیحیدگی اختیار کرلی تھی۔
اور اس کے بعد سے ہی کانگریس کے سینیئر رہنماؤں کی شیوسینا کے رکن پارلیمان سنجے راوت کے ساتھ شرد پوار کے گھر پر کانگریس-این سی پی کی متواتر ملاقات ہوتی رہیں اور اب ان پریس کانفرنس کے بعد یہ بات واضح ہوگئی ہے کہ مہاراشٹر میں جلد ہی اتحادی پارٹیوں کی حکومت کا قیام عمل میں آئے گا۔
