حیدرآباد: بالی ووڈ اداکارہ کنگنا رناوت اکثر و بیشتر سرخیوں میں رہتی ہیں۔ کنگنا وناوت اپنے بے ساختہ بیانات سے اپنی رائے کا اظہار کرنے کے لیے جانی جاتی ہیں۔ کنگنا رناوت نے بی جے پی رکن پارلیمنٹ رمیش بدھوڑی کے بہوجن سماج وادی پارٹی کے رکن پارلیمنٹ دانش علی پر انتہائی اشتعال انگیز تبصرہ پر ردعمل کا اظہار کیا ہے۔
ہفتے کے روز سوشل میڈیا پر اداکارہ کنگنا رناوت نے ایک پوسٹ کو دوبارہ شیئر کیا اور اپنی انسٹاگرام اسٹوری پر لکھا کہ ’’اپنی حدود کسی کو پار نہیں کرنی چاہیے، ایک بار جب وہ لکیر کسی بھی طرف سے پار ہوجاتی ہے تو اس کا اثر اس پر ضرور ہوتا ہے۔ اگر ہم اپنی حدود کو پار کرتے ہیں تب ہم کہاں تک جائیں گے یہ نہیں کہا جاسکتا؟ میری سب سے گذارش ہے کوہ اپنے حدود میں رہیں، جئے شری رام۔"
بی ایس پی کے رکن پارلیمنٹ دانش علی کے خلاف لوک سبھا میں بدھوڑی کے انتہائی اشتعال انگیز ریمارکس کے باعث جمعہ کو اپوزیشن رہنماؤں کے درمیان بڑے پیمانے پر غم و غصے کی لہر دوڑ گئی۔ اس معاملے پر راجیہ سبھا کے رکن اور کانگریس کے سابق رہنما کپل سبل، مجلس اتحاد المسلمین کے صدر و رکن پارلیمنٹ اسد الدین اویسی، نیشنل کانفرنس کے رہنما عمر عبد اللہ اور جموں و کشمیر کی سابق وزیراعلی محبوبہ مفتی کی بیٹی التجا مفتی نے بھی سخت رد عمل کا اظہار کیا ہے۔
مزید پڑھیں: نئی پارلیمنٹ میں نفرت کے کلچر کا افتتاح: کپل سبل
جبکہ دانش علی کنور نے کہا کہ اگر رمیش بدھوڑی کے خلاف کوئی قدم نہیں اٹھایا گیا تو وہ ایوان کی رکنیت چھوڑنے پر غور کر سکتے ہیں۔ دانش علی نے لوک سبھا کے اسپیکر اوم برلا کو ایک مکتوب روانہ کرتے ہوئے سخت کاروائی کا مطالبہ کیا وہیں دوسری جانب بی جے پی نے رمیش بدھوڑی کو وجہ بتاؤ نوٹس جاری کرتے ہوئے پندرہ دن کے اندر جواب طلب کیا ہے۔
