کورونا وائرس کے تعلق سے حکومت کی جانب سے جاری نئی گائیڈ لائنز سے ہر خاص و عام پریشان ہے۔ اس لیے مالیگاؤں میں جنتادل سیکولر پارٹی کے کارکنان نے لاک ڈاؤن کے خلاف احتجاج کرتے ہوئے جیل بھرو آندولن کیا۔
پانچ اپریل کو جاری کئے گئے جی آر میں واضح طور پر لکھا ہے کہ جمعہ کی شب آٹھ بجے تا پیر کی صبح سات بجے تک سخت لاک ڈاؤن نافذ رہے گا لیکن پولیس انتظامیہ منگل سے ہی تمام دوکانیں بند کرواتی نظر آئی۔ جس کے سبب جنتادل سیکولر نے جیل بھرو آندولن کیا۔
اس تعلق سے جنتادل سیکولر کے جنرل سکریٹری مستقیم ڈگنیٹی نے گزشتہ شب ہی کہا تھا کہ اگر پولیس چھوٹا موٹا کاروبار کرنے والوں کی دکانیں بند کرواتی ہے تو پارٹی کارکنان بڑی تعداد میں گرفتاری دے کر احتجاج درج کروائیں گے۔
مستقیم ڈگنیٹی کا مطالبہ ہے کہ رمضان المبارک و عید کا تہوار ہے چونکہ شہر کی عوام رمضان سے قبل اور رمضان میں ہی عید کے کپڑے اور جوتے چپل خریدتے ہیں اور یہی وجہ ہے کہ قدوائی روڈ، محمد علی روڈ وغیرہ پر کافی بھیڑ بھاڑ ہوتی ہے اس لیے انہیں دکان کھولنے میں رعایت دی جائے۔
اس تعلق سے قدوائی روڈ پر جنتادل سیکولر کی جانب سے احتجاج کیا گیا۔ یہاں بینر لگایا گیا تھا جس پر تحریر تھا کہ ہمیں گرفتار کرو اور جیل میں کھانا دو۔
مستقیم ڈگنیٹی سمیت جنتادل کارکنان کو ڈی وائے ایس پی لتا ڈھونڈے نے قدوائی روڈ پر ہی روک دیا۔ اس دوران پولیس اور جے ڈی ایس کارکنان کے درمیان نوک جھونک ہوئی۔
پولیس نے الزام عائد کیا کہ جنتا دل سیکولر کارکنان دکانداروں کا بہکا کر دکانیں کھلوا رہے ہیں۔ جس کے جواب میں مستقیم ڈگنیٹی نے کہا کہ پارٹی کارکنان کسی کو بھی نہیں بہکا رہے ہیں یہ روزی روٹی اور پیٹ کا سوال ہے۔
آخر میں مستقیم ڈگنیٹی سمیت پارٹی کارکنان کو گرفتار کرکے پولیس گاڑی میں بٹھا کر پولیس اسٹیشن لے جایا گیا-
پولیس اسٹیشن احاطے میں مستقیم ڈگنیٹی نے کہا کہ اگر پیر کے روز تک پولیس انتظامیہ لاک ڈاون ہٹانے یا اس میں نرمی برتنے کے تعلق سے کوئی فیصلہ نہیں کرتی تو پھر بڑی تعداد میں خواتین بھی جنتادل سیکولر کی صدر شان ہند کی قیادت میں احتجاج کریں گی۔
