وسیم رضوی کے خلاف سخت کارروائی کا مطالبہ

اترپردیش شیعہ وقف بورڈ کے سابق چیئرمین وسیم رضوی کے قرآن مخالف بیان پر علماء بلا لحاظ مسلک شدید مذمت کر رہے ہیں اور عوام میں بھی غصے کی لہر دوڑ گئی ہے اور کئی مقامات پر لوگوں نے سابق چیئرمین وسیم رضوی کے خلاف احتجاج درج کیا۔ اس تعلق سے مہاراشٹر کے مسلم اکثریتی شہر مالیگاؤں میں گزشتہ روز جنتادل سیکولر نے مقامی پولیس انتظامیہ کی ڈی وائے ایس پی لتا ڈھونڈے سے وسیم رضوی کے خلاف مقدمہ درج کرنے کا مطالبہ کیا۔

اس تعلق سے جنتادل سیکولر کے رہنما مستقیم ڈگنیٹی نے نمائندہ ای ٹی وی بھارت کو بتایا کہ 'وسیم رضوی فرقہ پرستوں کا آلۂ کار بنا ہوا ہے۔ یوپی وقف بورڈ بدعنوانی معاملے میں سی بی آئی تفتیش کر رہی ہے۔ اس تفتیش اور قانونی کارروائی سے بچانے کے لئے وسیم رضوی نے اس طرح کا بیان دیا ہے تاکہ فرقہ پرستوں کی جانب سے مدد ملے اور اس معاملے سے وہ بچ جائے۔'

بعدازاں مہاگٹھ بندھن کی گٹ نیتا شان ہند نے اس بات پر روشنی ڈالی کہ وسیم رضوی نے جو قرآن پاک کی 26 آیتوں کو تحریف کرنے کا جو گستاخانہ مطالبہ کرتے ہوئے سپریم کورٹ میں عرضداشت داخل کی ہے اس کے خلاف مقدمہ درج کیا جائے۔

انہوں نے مزید کہا کہ اگر وسیم رضوی پر مقدمہ درج نہیں کیا گیا تو جنتادل سیکولر 19 مارچ 2021 کو جمعہ کے دن شہیدوں کی یادگار کے پاس علامتی طور پر احتجاج کرے گی اور وسیم رضوی کے پتلے کو نذر آتش کیا جائے گا۔

اس معاملے میں شیعہ جماعت کے سرکردہ افراد نے بھی سخت مذمت کی اور وسیم رضوی کے خلاف سخت کارروائی کا مطالبہ کیا گیا۔

اس ضمن میں کل جماعتی تنظیم کے اطہر اشرفی نے کہا کہ 'وسیم رضوی کے قرآن مخالف بیان کے بعد ملک بھر میں سخت مذمت اور احتجاج کیا جارہا ہے اور اس معاملے کے بعد وسیم رضوی کے اہل خانہ نے بھی بائیکاٹ کر دیا اور یہ اعلان کر دیا کہ ان سے ان کا کوئی تعلق نہیں اور جو اس کی فرضی قبر بنائی گی تھی اس کو بھی لوگوں نے توڑ دیا۔'

انہوں نے کہا کہ 'وسیم رضوی نے بھارت کے ماحول کو خراب کیا ہے اس لئے اس پر سخت کارروائی ہونا چاہیے۔'