ممبئی: حکومت کی جانب سے صحافیوں کو مفت حج پر لے جانے کا دعویٰ جھوٹا ثابت ہوا کیونکہ جو لسٹ حکومت کی جانب سے جاری کی گئی ہے۔ اس میں 35 عازمین (صحافیوں) کی تفصیل ہے حالانکہ مین اسٹریم میں کام کرنے والے صحافی اس لسٹ میں برائے نام ہی رہے۔ صحافیوں کے نام پر جن لوگوں کے نام ہیں اُن کا صحافت یا حج جیسے اہم فریضے کی رپورٹنگ سے دور دور تک کوئی واسطہ ہی نہیں ہے لیکن اس دور میں جب حکومت ناممکن کو ممکن بنانے کے بلند وبانگ دعوے کرتی ہے تو اس 35 لوگوں کی لسٹ میں جن صحافیوں کے نام ہیں۔ اُن میں سے کچھ نے تو حج پر جانے کی خوشی میں اپنے عزیز و اقارب کے ساتھ دعوتیں بھی دی لیکن اب اُن کا مفت حکومتی حج کرنے کا خواب چکنا چور ہوگیا ہے۔
یہ بھی پڑھیں:
ای ٹی وی بھارت کے پاس ایسی 11 لوگوں کی لسٹ ہے۔ جسے مرکزی حکومت کے اقلیتی وزارت نے سعودی قونصل جنرل کو خط لکھ کر آگاہ کیا ہے کہ وہ ایسے 11 میڈیا نمائندوں کو بھیج رہے ہیں۔ تو اس طرح سے یہ لسٹ آنے کے بعد اب اُن سارے صحافیوں اور خاص کر وہ خود ساختہ صحافی جنہوں نے حج پر جانے کی تیاریاں مکمل کر لی تھیں۔ حالانکہ جن 11 خود ساختہ صحافیوں کے نام فائنل کیے گئے ہیں اُن کا بھی حج پر جانا اب تک طے نہیں ہو پایا کیونکہ اب تک اُن کا ویزا نہیں مل سکا۔ اور بھارت سے حج کی آخری پرواز 22 جون کو ہے۔ آپ کو بتادیں کہ مفت حکومتی حج اسکیم کی ذمےداری بی جے پی لیڈر حیدر اعظم کو سونپی گئی تھی۔ ہم نے جب اُن سے اس بارے میں بات چیت کی تو اُنہوں نے بتایا کہ 35 لوگوں کا انتخاب کیا گیا وہ ایسے لوگ ہیں جنہوں نے ملک ومعاشرے میں نمایاں کردار ادا کیا ہے۔ یہ ضروری نہیں کہ وہ صحافی ہی ہوں۔ ایسے فرد کی ہم نے شناخت کی اور ان کے نام بھیج دیے۔
