اورنگ آباد: ٹماٹر کی قیمتوں میں کمی سے کسان سراپا احتجاج

مہاراشٹر کے ضلع اورنگ آباد میں ٹماٹر کی قیمتوں میں بھاری گراوٹ سے کسان پریشان ہیں، کسانوں کا کہنا ہے کہ قیمتوں میں بھاری گراوٹ کے سبب فصل کے پیسے بھی نہیں نکل پا رہے ہیں جس کی وجہ سے کسانوں نے ٹماٹر کو راستے پر الٹ کر احتجاج درج کرایا۔

مشتعل کسانوں نے ٹماٹروں سے لدے ٹریکٹر کو راستوں پر ہی الٹ دییے، اورنگ آباد کے مضافات لاسور، گھن ساونگی، اور اطراف کے علاقوں میں کسانوں نے ٹماٹر راستے پر پھینک کر احتجاج درج کرایا۔

کسانوں کا کہنا ہے کہ پٹرول، ڈیزل کی قیمتوں میں اضافے اور ان کی فصلوں کے دام میں بے تحاشہ گراوٹ سے فصلوں کے دام ملنا دشوار ہوگیا ہے، ایسی فصلوں کو خسارے میں فروخت کرنے کے بجائے راستے پر پھینکنا بہتر ہے'۔

واضح رہے کہ تین سے چار روپے فی کلو ٹماٹر کی قیمت ہے جو کسانوں کے لیے خسارے کا سبب بن رہی ہے، متاثرہ کسانوں نے حکومت سے پٹرول ڈیزل کے دام کم کرنے کا مطالبہ کیا ہے ساتھ ہی نقصان کی بھرپائی کا مطالبہ کیا ہے۔