اے آئی ایم آئی ایم مہاراشٹرا کے رہنماؤں نے اورنگ آباد ڈیویژنل کمشنر سے ملاقات کرکے تبلیغی جماعت کے ارکان پر کئے گئے حملہ کی سخت مذمت کی اور ملزمین کے خلاف سخت قانونی کاروائی کرنے کا مطالبہ کیا۔
سنیل کیندریکر سے نمائندگی کے بعد مجلس کے رہنماؤں نے بتایا کہ کیج تعلقہ کے ایک گاؤں میں تبلیغی جماعت کے امیر اور ان کے ساتھیوں پر کیا گیا حملہ بزدلانہ عمل تھا اور اس حملہ کے ذریعہ مسلم اقلیت میں ڈر و خوف کا ماحول پیدا کرنے کی کوشش کی گئی۔
اورنگ آباد مجلس کے صدر عبدالسمیر ساجد نے کہا کہ حملے کی مناسب انداز میں تحقیقات کی جانی چاہئے اور فوری طور پر قصور واروں کو گرفتار کیا جانا چاہئے۔ انہوں نے مستقبل میں اس طرح کے واقعات کی روک تھام کےلیے بھی مناسب اقدامات کرنے کا محکمہ پولیس سے مطالبہ کیا۔
انہوں نے مزید بتایا کہ ڈیویژنل کمشنر نے مجلسی وفد کے مطالبہ پر سنجیدگی سے غور کرنے اور مناسب کاروائی کرنے کا تیقن دیا۔
