'بی جے پی میں سب گینگ کے لوگ شامل'

نیشنلسٹ کانگریس پارٹی کے ترجمان نواب ملک نے کہا کہ 'بی جے پی میں سب گینگ وار کے لوگ جمع ہو رہے ہیں۔'

ریاست مہاراشٹر میں اسمبلی انتخابات کے لیے سیٹوں کے تقسیم کے سلسلے میں ممبئی میں کانگریس اور این سی پی کی مشترکہ پریس کانفرنس منعقد کی گئی۔ اس پریس کانفرنس کے دوران این سی پی کے ترجمان نے ان خیالات کا اظہار کیا۔

نواب ملک نے کہا کہ 'الگ الگ گینگ کے لوگ بی جے پی میں جمع ہو رہے ہیں، اس کے بارے میں نے پہلے بھی کہا تھا۔'

کانگریس کے سینیئر رہنما اور سابق وزیراعلیٰ پرتھوی راج چوہان نے کہا کہ 'سیٹوں کی تقسیم سے متعلق تفصیلات فراہم کرنے کے لیے یہ پریس کانفرنس منعقد کی گئی ہے لیکن اب بھی کچھ چھوٹی پارٹیوں کے ساتھ بات چیت جاری ہے جس کے بارے میں اس وقت کچھ بتایا نہیں جا سکتا۔ جس کے تعلق سے بعد میں پریس نوٹ کے ذریعے اطلاع دی جائے گی۔'

اس پریس کانفرنس میں سماج وادی پارٹی کے رہنما ابو عاصم اعظمی بھی موجود تھے۔ انہوں نے کہا کہ 'میں، شیوسینا اور بی جے پی کو روکنے کے لیے اتحاد میں شامل ہوا ہوں۔ بی جے پی ۔ شیوسینا مذہب کے نام پر سیاست کر رہی ہے جبکہ ملک میں معاشی صورتحال ابتر ہے لہذا کسی بھی صورت میں اتحاد کا حصہ بننے کی میری کوشش ہے۔'