بھیونڈی میں عید الاضحیٰ کے موقع پر صفائی اور کچرا اٹھانے میں کوتاہی برتنے کو سے ناراض کارپوریٹر فراز بہاؤالدین نے میونسپل کارپوریشن کے صدر دروازے پر کچرا پھینک کر اپنی ناراضگی کا اظہار کیا۔
فراز بہاؤالدین نے انتباہ دیا کہ اگر بدھ کی شام تک شہر میں کچرے کی نکاسی کا کام شروع نہ کرنے کی صورت میں وہ کارپوریشن کے سامنے کچرے کا ڈھیر لگادیں گے۔
انہوں نے بتایا کہ کارپوریشن نے شہر سے کچرے کی نکاسی کرنے والی گاڑیوں کے ٹھیکیداروں کا بل چھ ماہ سے ادا نہیں کیا ہے جس کی وجہ سے ٹھیکیداروں نے ہڑتال پر جانے کی دھمکی دی ہے۔
کارپوریٹر نے کہا کہ اگر ٹھیکیدار ہڑتال پر چلے جائیں تو عیدالاضحیٰ کے موقع پر عوام کو کافی مشکلات پیش آسکتی ہیں اسی لیے انہوں نے میونسپل کمشنر ڈاکٹر پنکج آشیا سے متوقع ہڑتال کو روکنے کی درخواست کی ہے۔
انہوں نے بتایا کہ میونسپل کمشنر کو فون پر حالات سے واقف کروایا گیا جس کے بعد کمشنر نے کسی بھی حال ہڑتال نہ ہونے کا یقین دلایا تھا لیکن گذشتہ روز ٹھیکیداروں نے کچرے کی نکاسی کا کام بند کردیا جس کے بعد شہر میں جگہ جگہ کچرے کے ڈھیر جمع ہوگئے۔
عید کے پیش نظر میونسپل کارپوریشن کی جانب سے کچرے کی نکاسی کے لیے کوئی ٹھوس اقدامات نہیں کئے جارہے ہیں۔
کارپوریٹر فراز نے مزید بتایا کہ احتجاج کے بعد ڈپٹی میونسپل کمشنر(ہیڈ کواٹر) دیپک ساونت نے انہیں جلدازجلد شہر سے کچرے کی نکاسی کےلیے انتظامات کرنے کا یقین دلایا ہے۔
