بھیما کورے گاؤں تشدد کیس کے اہم ملزم رونا ولسن کے لیپ ٹاپ کی آرسینل کنسلٹنگ فارینسک رپورٹ میں پایا گیا کہ اس لیپ ٹاپ میں مالوئیر کے ذریعہ ملزمین کے خلاف ثبوت پلانٹ کئے گئے تھے اور بعد میں یہی لیپ ٹاپ پولیس نے ضبط کیا تھا۔
آرسینل کنسلٹنگ امریکہ کی ڈجیٹل فارینسک پر کام کرنے والی کمپنی ہے۔ اس فرم نے اپنی تفتیش میں بتایا کہ سماجی کارکن رونا ولسن کی گرفتاری سے قبل سائبر حملہ آوروں نے ان کے لیپ ٹاپ میں مالویئر سے چھیڑ چھاڑ کی اور کم از کم 10 ڈاکیومنٹ ہیڈن فائل بنا کر محفوظ کر دئے گئے تھے۔
رونا ولسن کے وکیل نے بامبے ہائی کورٹ کو بتایا کہ ان کے موکل کے لیپ ٹاپ کی فارینسک رپورٹ میں پایا گیا کہ لیپ ٹاپ میں سائبر چھیڑ چھاڑ کے ذریعہ دھمکی آمیز خطوط اس میں پلانٹ کئے گئے تھے۔
ان خطوط میں مودی کو قتل کر کے حکومت کا تختہ پلٹنے کے بارے میں لکھا ہوا تھا۔
کون ہے رونا ولسن؟
رونا ولسن جے این یو کے سابق طالب علم ہیں اور دہلی میں مقیم ہیں۔ وہ سیاسی قیدیوں کی رہائی کے لیے کام کرتے ہیں اور پچھلے کچھ برسوں سے سرگرم سماجی کارکنان میں سے ایک تھے۔
وہ سیاسی قیدیوں کی رہائی کے لیے بنائی گئی کمیٹی کے رکن ہیں۔ انہیں بھیما کوریگاؤں تشدد کے فوراً بعد ہی گرفتار کر کے ان کا لیپ ٹاپ قبضے میں لے لیا گیا تھا۔
