ریاست مہاراشٹر کے ممبئی میں عروس البلاد کے مختلف حساس علاقوں میں پولیس کا مارچ نکالا جا رہا ہے اور عوام میں تحفظ اور اعتماد کا احساس پیدا کرنے کی کوشش جاری ہے۔
شمال وسطی ممبئی کے علاقے انٹاپ ہل میں آج دوپہر سنیئر انسپکٹر پرشانت راجے کی قیادت میں ایسا ہی مارچ کیا گیا جو کہ کئی اہم علاقوں سے گزرتا ہوا پولیس تھانے واپس لوٹ آیا۔
ذرائع کے مطابق دارالحکومت دہلی کی وارداتوں اور ممبئی،تھانے، بھیونڈی، ممبرا اور میرا روڈ سمیت مہاراشٹر کے مختلف شہروں میں روزانہ شہری ترمیمی قانون (سی اے اے )، این آر سی اور این پی آر کے خلاف مظاہروں اور کئی علاقوں میں ان کی حمایت میں مظاہرے اور جلوس کے مدنظر محکمہ داخلہ نے پولیس کو چوکنا کر دیا ہے۔ اس لیے جگہ جگہ پولیس کا گشت بڑھا دیا گیا ہے اور حساس علاقوں میں ریاستی ریزر و پولیس فورس(ایس آر پی ایف) بھی تعینات کر دی گئی ہے۔
مہاراشٹر میں حال ہی میں کئی شہروں میں سی اے اے کے مخالف اور حامیوں کے درمیان تصادم کے نتیجے میں کشیدگی پھیل گئی تھی، اس لیے پولیس کو ہائی الرٹ پر رکھا گیا ہے۔
آج دوپہر شہر کے حساس ترین علاقہ انٹاپ ہل پولیس تھانے کی حدود میں واقع حساس علاقوں میں پولیس نے مارچ کیا،جس کی قیادت مقامی تھانے کے انچارج پرشانت راجے نے کی۔
انہوں نے کہا کہ اس طرح کا مارچ ایک مقصد کے تحت کیا جا رہا ہے اور علاقے میں امن و ضبط کی صورت حال کو اولیت دی جائے گی۔
