مہاراشٹر حکومت نے ماحولیات خرابی کے پیش نظر آرے میں میٹرو کار شیڈ بنانے کے فیصلے کو منسوخ کردیا ہے۔ ریاستی حکومت اب کانجور مارگ پر ایک نیا شیڈ تعمیر کرے گی۔ اس کے علاوہ آرے میٹرو کار شیڈ کی مخالفت کرنے والے لوگوں کے خلاف دائر مقدمات کو بھی واپس لے لیا گیا ہے۔
وزیر اعلیٰ ادھو ٹھاکرے نے اعلان کیا کہ جب ہم اقتدار میں نہیں تھے تو ہم نے آرے کار شیڈ منصوبے کی مخالفت کی تھی اور ماحولیات کے بارے میں فکر مند افراد نے بھی اس پر اعتراض کیا تھا یہ کار شیڈ پروجیکت منسوخ کیا جائے اور اب ہم نے اس پروجیکٹ کو منسوخ کردیا ہے۔
وزیراعلیٰ نے منصوبے کی مخالفت کرنے والوں کے خلاف دائر مقدمہ واپس لینے کا بھی اعلان کرتے ہوئے کہا کہ اس منصوبے کے خلاف احتجاج کے دوران بہت سارے لوگوں کو گرفتار کیا گیا تھا اب ان کے خلاف درج مقدمات واپس لے لئے گئے ہیں۔
ادھو ٹھاکرے نے کہا کہ ہم نے آرے کی 600 ایکڑ اراضی کو جنگل قرار دے دیا ہے۔ یہاں سے اس منصوبے کو واپس لینے کے بعد جنگل کا رقبہ 800 ایکڑ ہوگیا ہے۔
وزیر اعلیٰ ادھو ٹھاکرے نےکہا کہ آرے کار شیڈ کو اب کانجور مارگ منتقل کردیا گیا ہے۔ انہوں نے کہا کہ وہاں سرکاری اراضی ہے جو میٹرو کار شیڈ بنانے میں استعمال ہوگی جبکہ آرے میں بنائی گئی بلڈنگ کو کسی دوسرے مقصد کے لیے استعمال میں لایا جائے گا۔
واضح رہے کہ گزشتہ برس اکتوبر میں ممبئی میٹرو ریل کارپوریشن لیمیٹیڈ نے آرے کالونی میں میٹرو کار شیڈ بنانے کے لیے یہاں کے درخت کاٹنے شروع کردیئے تھے۔ یہ پروجیکٹ انڈر گراؤنڈ قلابہ باندرہ میٹرو کوری ڈور کے لیے تعمیر کیا جارہا تھا۔
جب یہ پروجیکٹر بنایا جارہا تھا اس وقت دیویندر فڑنویس ریاست کے وزیر اعلی تھے لیکن ریاست میں اقتدار کی تبدیلی کے بعد ادھو ٹھاکرے نے اس منصوبے کو روک دیا۔
