دہلی پولیس کے خلاف بھوپال میں طالبات کا مظاہرہ

مدھیہ پردیش کے دارالحکومت بھوپال میں لگاتار احتجاجی مظاہروں کا سلسلہ جاری ہے۔

شہریت ترمیمی قانون 2019 کو پارلیمنٹ کی منظوری ملنے کے بعد اس کی مخالفت تیز ہوتی جا رہی ہے۔

دراصل متنازعہ شہریت قانون 2019 کی مخالفت میں مظاہرہ کررہے دہلی کی جامعہ ملیہ اسلامیہ یونیورسٹی اور علی گڑھ مسلم یونیورسٹی کے طلباء کے ساتھ یکجہتی دکھانے کے لئے دارالحکومت بھوپال کے تاریخی اقبال میدان میں مختلف کالجوں کے طلباء اور طالبات نے مظاہرہ کیا-

احتجاجی مظاہرے کی قیادت کر رہی طالبہ اسماء خان نے کہا کہ 'ہمارا مطالبہ ہے کہ مرکزی حکومت جلد از جلد این آر سی اور شہریت ترمیمی قانون 2019 پر نظرثانی کریں۔'

انہوں نے کہا کہ 'اس کے علاوہ ہمارا مطالبہ ہے کہ جامعہ اور اے ایم یو میں کارروائی کو لے کر پولیس اور افسروں کے خلاف سخت کارروائی کی جائے-

اقبال میدان میں منعقدہ مظاہرے میں متحدہ کالجوں کی بڑی تعداد میں طلبہ کے ساتھ عام شہری بھی شامل ہوئیں اور پر امن احتجاج کیا۔