بھوپال: مدھیہ پردیش میں پولنگ کے تین دن باقی رہنے کے درمیان انتخابی مہم کے تقریباً آخری دنوں میں وزیر اعظم نریندر مودی آج اندور میں روڈ شو کریں گے اور ریاست میں بھرپور طریقے سے انتخابی مہم چلاتے ہوئے تین انتخابی جلسوں سے خطاب کریں گے۔ بھارتیہ جنتا پارٹی کی طرف سے دی گئی جانکاری کے مطابق وزیر اعظم صبح 11 بجے بیتول، دوپہر 1.30 بجے شاجاپور اور 4.45 بجے جھبوا میں انتخابی ریلیوں سے خطاب کریں گے۔ اس کے بعد وہ شام 6 بجے اندور میں منعقد ہونے والے روڈ شو میں شرکت کریں گے۔
وہیں دوسری جانب مورینا ضلع کی دمنی اسمبلی سیٹ نے پورے ملک کی نظریں اس ضلع پر مرکوز ہوگئی ہیں۔ انتخابی مہم اپنے عروج پر ہے، وزیر اعظم نریندر مودی سمیت بی جے پی کے کئی لیڈر اس پارلیمانی حلقے کا دورہ کر چکے ہیں۔ حالانکہ کانگریس کا کوئی قومی لیڈر ابھی تک یہاں نہیں آیا ہے۔ پارلیمانی حلقوں میں زیادہ تر سیٹوں پر کانگریس اور بی جے پی کے درمیان آمنے سامنے مقابلہ ہے، لیکن کچھ اسمبلی حلقوں میں بی ایس پی نے سہ رخی ٹکر کی صورتحال پیدا کر دی ہے۔
دمنی اسمبلی حلقہ وہ علاقہ ہے جہاں سے بھارتیہ جنتا پارٹی نے اپنے تجربہ کار لیڈر اور مرکزی وزیر نریندر سنگھ تومر کو میدان میں اتار کر اسے ریاست کی سب سے ہاٹ سیٹوں میں سے ایک بنا دیا ہے۔ یہاں کانگریس کے موجودہ ایم ایل اے رویندر سنگھ تومر بھیڈوسا اور بی ایس پی امیدوار سابق ایم ایل اے بلویر سنگھ ڈنڈوتیا مسٹر تومر سے مد مقابل ہیں، جس سے یہ مقابلہ مزید دلچسپ ہو گیا ہے۔ اس کے ساتھ ہی عام آدمی پارٹی کے امیدوار سریندر سنگھ تومر نے بھی اس سیٹ کو جیتنے کے لیے ہر پارٹی کی کوششوں کو مزید مشکل بنا دیا ہے۔ ایسے میں تومر ووٹوں کی تقسیم کی وجہ سے بی جے پی امیدوار مسٹر تومر کو انتخابات میں اپنی پوری طاقت استعمال کرنا پڑ رہا ہے۔
مزید پڑھیں: کانگریس مدھیہ پردیش میں آلو سے بنے سونے کا محل بنانے کا وعدہ بھی کر سکتی ہے، مودی
سماولی اسمبلی حلقہ سے بی جے پی نے 2020 میں کانگریس سے بغاوت کرکے پارٹی میں شامل ہونے والے اندرل سنگھ کنسانہ کو ٹکٹ دیا ہے۔ وہ بی جے پی حکومت میں سابق وزیر رہ چکے ہیں۔ کانگریس نے پہلے کلدیپ سنگھ سیکروار کو ٹکٹ دیا تھا، لیکن اپوزیشن کے دباؤ میں موجودہ ایم ایل اے عجب سنگھ کشواہا کو امیدوار اعلان کیا گیا۔ اس دوران ان کا ٹکٹ منسوخ ہونے کی وجہ سے کلدیپ سیکروار نے اپنا’ہاتھ‘ چھوڑ کر ’ہاتھی‘ پر سوار ہونے میں دیر نہیں لگائی اور اب وہ بی ایس پی امیدوار کے طور پر الیکشن لڑ رہے ہیں۔
واضح رہے کہ ریاست میں 17 نومبر کو ووٹنگ ہونی ہے۔ اس سے قبل انتخابی مہم کل شام کو اختتام پذیر ہو جائے گی۔ نتائج 3 دسمبر کو آئیں گے۔
