بھوپال میں شیوراج سنگھ چوہان نے نامہ نگاروں سے بات کرتے ہوئے کہا کہ کانگریس نے عوام کے ساتھ دھوکہ کیا ہے جس کو عوام کے سامنے لانا ضروری ہے۔
انہوں نے کمل ناتھ کی جانب سے مندروں کے درشن کرنے پر طنز کرتے ہوئے کہا کہ ’انتخابات سے عین قبل کانگریس کوبھگوان یاد آتے ہیں۔ انہوں نے کہا کہ کمل ناتھ کو سال بھر مندر جانا چاہئے۔
شیوراج سنگھ چوہان نے کہا کہ کانگریس کی 14 ماہ کی حکومت نے مدھیہ پردیش کا بہت نقصان کیا ہے جسے ہم بہت جلد عوام کے سامنے لائیں گے۔ انہوں نے کہا کہ کانگریس نے کسانوں کو قرض معاف کرنے کے نام پر دھوکہ دیا ہے۔
انہوں نے مزید کہا کہ مدھیہ پردیش بجٹ کی تفصیلات سے پتہ چلتا ہے کہ قرض معافی اسکیم کا تعلق جاریہ سال سے نہیں تھا بلکہ یہ اسکیم گذشتہ سال کی تھی۔ شیوراج سنگھ نے کہا کہ اس طرح کے کئی معاملے 14 ماہ کے دوران کانگریس حکومت میں کئے گئے تھے جنہیں عوام کے سامنے لانا ضروری ہے۔
