جمعیت علماء اور سرو دھرم سدبھاونا منچ نے شہید اشفاق اللہ خان کو خراج عقیدت پیش کیا

عظم مجاہد آزادی شہید اشفاق اللہ کے یوم ولادت کے موقع پر آج جمعیت علمائے ہند اور سرو دھرم سد بھاونا منچ کی جانب سے انہیں خراج عقیدت پیش کیا گیا۔

ریاست مدھیہ پردیش کے دارالحکومت بھوپال میں جمعیت علمائے ہند اور سرو دھرم سدبھاونا منچ نے آزادی کے امرت مہوتسو کے تحت آج مجاہد آزادی اشفاق اللہ خان کے یوم پیدائش کے موقع پر انہیں یاد کیا اور انہیں خراج تحسین پیش کیا۔

اس موقع پر سب سے پہلے شہید اشفاق اللہ خاں کے ایصال ثواب کے لیے قرآن خوانی کا اہتمام کیا گیا۔ اس کے بعد جمعیت علمائے ہند اور سرو دھرم سد بھاونا منچ کے اراکین نے بھوپال کے شہید گیٹ پر موم بتی روشن کر خراج عقیدت پیش کیا۔

اس دوران جمعیت علمائے ہند اور سرو دھرم سد بھاونا منچ نے حکومت سے مطالبہ کیا ہے اسکول اور کالجوں کے نصاب میں بھارت کی آزادی کے لیے شہید ہوئے تمام مجاہدین آزادی کے قربانیوں کو شامل کیا جائے۔ ہماری آئندہ نسل اور نوجوان طبقہ ان شہید مجاہدین آزادی کی بہادری اور کارناموں کو جان سکیں۔ ان کے دلوں میں بھی وطن کے لیے محبت پیدا ہو اور ان کو یہ بھی معلوم رہے کہ ہمارا ملک کتنی مشکلوں سے آزاد ہوا ہے اور ان شہیدوں کی وجہ سے ہم ایک آزاد ملک میں سانس لے پا رہے ہیں۔