بی جے پی کے رہنماؤں نے تصویر کشی کے لیے آکسیجن ٹینکر روکے رکھا

مدھیہ پردیش میں کورونا تیزی سے پھیل رہا ہے جس کے سبب اسپتالوں میں بیڈز کی کمی ہے۔ وہیں آکسیجن کی قلت کی وجہ سے بھی مریضوں کو مشکلات کا سامنا کرنا پڑ رہا ہے۔

مدھیہ پردیش کے اندور میں بھی کورونا کیسز میں بے تحاشہ اضافہ ہوتا جارہا ہے اور مریضوں کی تعداد تیزی سے برھ رہی ہے۔ وہیں اسپتالوں میں مناسب انتظامات نہ ہونے کی وجہ سے مشکلات پیش آرہی ہیں۔

اطلاعات کے مطابق آج ایک آکسیجن کا ٹینکر اندور آرہا تھا کہ بھارتیہ جنتا پارٹی کے رہنماؤں نے اسے روک کر تقریباً 45 منٹ تک تقریب منعقد کی جس کی وجہ سے متعدد ہسپتالوں میں آکسیجن کی قلت ہوگئی۔

بی جے پی کے رہنماؤں کی حرکت پر کانگریس کے صوبائی ترجمان نریندر سلوجا نے تنقید کی۔ انہوں نے کہا کہ بی جے پی کے رہنماؤں کو صرف کریڈٹ لینے کا شوق ہے، انہیں عوامی مشکلات کی کوئی پرواہ نہیں ہے۔ انہوں نے الزام عائد کیا کہ بی جے پی کے رہنماؤں کی جانب سے 45 منٹ تک آکسیجن ٹینکر کو روکنے سے متعدد مریضوں کو مشکلات کا سامنا کرنا پڑا۔

انہوں نے کہا کہ جہاں ایک طرف لوگ کورونا وبا سے پریشان ہے۔ وہیں بی جے پی کے رہنما صرف اپنی سستی شہرت کے لیے آکسیجن ٹینکر کو روکے رکھا تاکہ ٹینکر کے ساتھ اپنی تصویریں کھنچوا سکیں۔