دگ وجے سنگھ نے اپنے ایک ٹویٹ میں کانگریس کے سابق صدر راہل گاندھی کو مخاطب کرتے ہوئے کہا ' آپ ہمارے صدر رہیں یا نہیں، آپ ہمیشہ میرے رہنما رہیں گے۔ آرایس ایس اور بی جے پی کے خلاف نظریات کی آپ کی لڑائی میں،میں ہمیشہ آپ کے ساتھ رہوں گا۔ ہم آپ کے جذبات کی قدر کرتے ہے۔'
انہوں نے کہا کہ ایک ملک کے طور پر بھارت کے معنی محبت، سچائی اور عدم تشدد ہے اور گاندھی نے نفرت اور تشدد پھیلانے والی، تقسیم کرنے والی قوتوں سے جدوجہد کا آغاز کیا ہے۔
واضح رہے کہ حالیہ لوک سبھا الیکشن میں پارٹی کی خراب کارکردگی کے بعد سے راہل گاندھی پارٹی کے صدر کے عہدے سے استعفیٰ دینے کے فیصلے پرقائم ہیں۔
راہل گاندھی نے بدھ کو سوشل میڈیا کے ذریعے ایک بارپھر واضح کیا ہے کہ وہ اب پارٹی کے صدر نہیں ہیں۔ حالانکہ کانگریس پارٹی ورکنگ کمیٹی نے ابھی ان کے استعفے کو منظور نہیں کیا ہے۔
