مدھیہ پردیش کانگریس کی میڈیا سیل کی صدر شوبھا اوجھا نے بھارتیہ جنتا پارٹی کے لیڈروں کے ذریعہ شہریت ترمیمی قانون اور قومی شہریت رجسٹر (این آر سی) کے سلسلے میں کانگریس پر افواہ پھیلانے کےالزام کو بے بنیاد قرار دیا ہے۔
محترمہ اوجھا نے کہا کہ این آر سی اور سی اے اے کے معاملے پر بیک فُٹ پر آ چکے بی جے پی کے لیڈر کہہ رہے ہیں کہ کانگریس اس معاملہ میں افواہ پھیلانے کا کام کر رہی جو سراسر غلط ہے۔
انہوں نے کہا شاید بی جے پی لیڈر اس زمینی حقیقت کو سمجھ نہیں پا رہے ہیں کہ مرکزی حکومت کے ذریعے لائے گئے سیاہ قوانین کے خلاف، عوام پہلے ہی بیدار ہوچکے ہیں۔
کانگریس لیڈر شوبھا اوجھا نے کہا کہ ملک کی دیگر ریاستیں جب اس معاملے پر تشدد کا شکار ہو گئی ہیں لیکن مدھیہ پردیش میں امن برقرار ہے۔
انہوں نے کہا بی جے پی لیڈروں کو اس حقیقت کو تسلیم کر لینا چاہئے کہ ایسے سیاہ قوانین کو ملک بھر میں زبردست اختلاف کے بعد بھی لاگو کرنے کا فیصلہ اور ملک کو غیر مستحکم کرنے کا کام بی جے پی کی مرکزی حکومت نے کیا ہے۔
