ضلع کپوارہ میں درجنوں آشا ورکروں نے احتجاج کرتے ہوئے انتظامیہ سے ماہانہ تنخواہ میں اضافہ کیے جانے کا مطالبہ کیا ہے۔
احتجاج کر رہی آشا ورکروں نے کہا کہ آفات سماوی، انتخابات، ٹیکہ کاری مہم کے علاوہ وبائی صورتحال میں بھی انہوں نے تندہی کے ساتھ خدمات انجام دیں۔ تاہم ماہانہ تنخواہ کے نام پر ان کے ساتھ مذاق کیا جاتا ہے۔
انہوں نے کہا کہ سنہ 2006 سے وہ بخوبی اپنی ڈیوٹی انجام دے رہی ہیں تاہم اس دوران ان کی ماہانہ تنخواہ میں بھی کوئی خاطر خواہ اضافہ نہیں کیا گیا وہیں ان کی مستقلی کے حوالے سے بھی ٹھوس اقدامات نہیں اٹھائے گئے۔
احتجاجی خواتین نے کہا کہ ماہانہ تنخواہ 2000 روپے ان کے ساتھ محض ایک مذاق ہے۔ وہیں احتجاج میں شامل ایک سماجی کارکن نے اس ضمن میں مرکزی سرکار کو تنقید کا نشانہ بناتے ہوئے کہا: ’’بے جے پی سرکار خواتین کے حقوق کے حوالے سے بلند و بانگ دعوے کرتی ہے، تاہم ان کے دور میں خواتین کا اپنے حقوق کے لیے سڑکوں پر دھرنا دینا ان کے دعووں پر ایک سوالیہ نشان ہے۔‘‘
آشا ورکروں نے جموں و کشمیر انتظامیہ سے ان کی ماہانہ تنخواہ میں اضافہ اور انہیں مستقل نوکری فراہم کیے جانے کا مطالبہ کیا ہے۔
