ماس پروموشن کی مانگ کرتے ہوئے گیارہویں جماعت کی طالبات نے ضلع کولگام میں احتجاج کیا۔ احتجاج کے سبب ٹریفک کی نقل و حرکت مسدود ہو کر رہ گئی۔
احتجاجی طالبات نے ای ٹی وی بھارت کو بتایا کہ ’’دفعہ 370کی منسوخی کے بعد پیدا شدہ صورتحال اور پھر عالمی وبا کورونا وائرس کے سبب عائد لاک ڈائون کے دوران تعلیمی ادارے مقفل رہے اور طلباء پڑھائی سے محروم رہے۔‘‘
احتجاج کر رہی طالبات نے دعویٰ کیا کہ انہوں نے نصاب مکمل نہیں کیا اور ایسے میں وہ امتحان کیونکر دے سکتی ہیں۔
انہوں نے آن لائن نظام تعلیم کے حوالے سے کہا کہ ’’طلباء سست رفتار انٹرنیٹ 2G کے ذریعے پڑھائی نہیں کر پائے اور جموں و کشمیر انتظامیہ آن لائن درس و تدریس کا بہانہ بنا کر امتحانات منعقد کر رہی ہے جو طلباء کے ساتھ زیادتی ہے۔‘‘
ای ٹی وی بھارت کے ساتھ بات کرتے ہوئے گیارہویں جماعت کی طالبات نے ماس پروموش کی مانگ کرتے ہوئے انتظامیہ سے ’’طلباء کے مستقل کو تاریک ہونے سے بچانے‘‘ کی درخواست کی۔
