دمحال ہانجی پورہ میں عارضی پل سے گزرتے ہوئے 40 سالہ شمیمہ بانو ساکنہ ناگام نورآباد پیر پھسل جانے کی وجہ سے دریائے ویشو میں ڈوب کر ہلاک ہوگئی۔
خاتون کی موت سے پورے علاقے میں ماتم چھا گیا۔ مقامی لوگوں اور انتظامیہ کے تعاون سے متوفیہ کی نعش کو دریائے ویشو سے نکالا گیا۔
واضح رہے کہ آڈیجن دمحال ہانجی پورہ عارضی پل جو کہ پچھلے پانچ ماہ سے ناقابل آمدورفت ہے، جس کے وجہ سے نورآباد کے ایک لاکھ سے بھی زائد لوگوں کو مشکلات کا سامنا کرنا پڑرہا ہے۔
اگر چہ دمحال ہانجی پورہ سے کولگام تک کی مسافت 19 کلومیٹر ہے جبکہ آڈیجن سے کولگام تک کی مسافت صرف 10 کلومیٹر ہی ہے۔
اس عارضی پل پر کام نہ لگنے کی وجہ سے علاقہ نورآباد کے لوگ کافی مشکلات سے اپنی زندگی گذارنے پر مجبور ہیں۔ انتظامیہ کی لاپرواہی کی وجہ سے ہی ایسی وارداتیں رونما ہوتی ہیں۔
اس سے پہلے بھی کئی افراد اس عارضی پل سے گزرتے ہوئے دریائے ویشو میں گر چکے ہیں، لیکن معجزاتی طور پر وہ لوگ بچ گئے۔
