ضلع کولگام کے امونو، چیک پورہ اور اشموجی سمیت کئی دیہات سے وابستہ کسانوں نے محکمہ آبپاشی کے خلاف احتجاج کرتے ہوئے محکمہ کے افسران کے خلاف کارروائی کیے جانے کی مانگ کی۔
احتجاج کر رہے کسانوں نے بتایا کہ علاقے میں گزرنے والی نہر کی صفائی کے حوالے سے محکمہ نے ٹینڈر طلب کیے، تاہم نہر کی صفائی برائے نام کی گئی جس کے سبب دھان کے کھیتوں تک پانی کی سپلائی متاثر ہو رہی ہے۔
مقامی باشندوں کے مطابق نہر کی صفائی کے علاوہ اسکی مرمت کے حوالے سے بھی محکمہ غیر سنجیدہ کا مظاہرہ کر رہا ہے۔ ان کے مطابق نہر کی مرمت نہ کیے جانے اور نہر سے پانی لیک ہونے کے سبب آس پڑوس کے مکانات کو بھی کافی نقصان پہنچ رہا ہے۔
انہوں نے دعویٰ کیا کہ اس ضمن میں مقامی باشندوں اور کسانوں نے محکمہ کے ایگزیکٹیو انجینئیر سے کئی بار رابطہ قائم کیا تاہم انکے مطابق اس ضمن میں محکمہ کی جانب سے ٹھوس اقدامات نہیں اٹھائے جا رہے ہیں۔
احتجاج کر رہے کسانوں نے نہر کی مرمت اور صفائی کی مانگ کرتے ہوئے محکمہ آبپاشی کے افسران کے خلاف کارروائی کیے جانے کا بھی مطالبہ کیا ہے۔
