دس گاؤں کو شہر سے جوڑنے والی سڑک کی حالت خستہ

ضلع ہیڈکواٹر کولگام سے محض 7 کلو میٹر دور بوگنڈ نامی گاؤں سے ایک لنک روڈ گزرتا ہے جس سے دس گاؤں آپس میں جڑتے ہیں۔

لوگوں کے مطابق محکمہ پبلک ورکز ڈیپارٹمینٹ (پی ڈبلیو ڈی) کی جانب سے اس سڑک پر چار سال پہلے کام شروع کیا گیا تھا مگر آج تک یہ سڑک مکمل نہیں کی گئی ہے۔

اس سڑک سے دس گاؤں کے لوگوں کا آنا جانا رہتا ہے، لوگ پچھلے چار سال سے انتظار میں ہیں کہ کب اس سڑک کو درست کیا جائیگا، تاکہ ان کی مشکلات کا کچھ تو حل ہو۔

مقامی باشندہ شوکت احمد کا کہنا تھا : 'ہم نے حکومت سے بار بار اپیل کی ہے لیکن ہماری کوئی نہیں سنتا، ہم نے ڈی سی دفتر سے لے کر آر این بی ہر دفتر کے چکر کاٹے ہیں لیکن اس سڑک کو ابھی تک درست نہیں کیا گیا'۔

مقامی ڈرائیور محمد اسمائیل لون کا کہنا تھا: ' اس روڈ کو مکمل کرنے کے لئے محکمہ آر اینڈ بی کے حوالے کیا گیا تھا مگر محکمہ نے اسے ایسے ہی چھوڑ دیا۔ اس سڑک پر اتنے گڈھے ہیں کہ اس پر گاڑی چلانا مشکل ہو جاتا ہے۔ اگر روڈ سے کوئی گزرتا ہے تو اس کے کپڑے خراب ہونے طے ہیں۔

لوگوں نے کہا کہ اس روڈ سے ہمیں کئی طرح کی مشکلات کا سامنا کرنا پڑتا ہے۔ مقامی لوگوں نے گورنر انتظامیہ سے مطالبہ کیا کہ بوگنڈ کے اس روڈ کو جلد از جلد مکمل کیا جئے تاکہ عام لوگوں کو سہولت ملے ۔