چوگام میں کمسن بچہ لاپتہ، تلاش جاری

اہل خانہ کا کہنا ہے کہ اندھیرے میں تیندوے نے بچے پر حملہ کیا جبکہ پولیس نے کہا ہے کہ تلاش جاری ہے اور اس معاملہ میں ابھی تک باوثوق کچھ نہیں کہا جاسکتا۔

جنوبی ضلع کولگام کے چوگام پرتاپ پورہ علاقے میں منگل کی شام مبینہ طور پر تیندوا ایک چار سالہ کمسن بچہ کو گھر کے باہر اٹھا کر لے گیا۔ نزاکت حسین خان ولد محمد رفیق خان ساکنہ چوگام منگل کی شام کو گھر کے قریب مبینہ طور پر تیندوے کا شکار بن گیا۔

لاپتہ بچے کے والد محمد رفیق خان نے کہا کہ یہ واقعہ اس وقت پیش آیا جب یہاں اندھیرا تھا اس بیچ بچے کی چیخنے چلانے کی آواز آئی تاہم اندھیرا اور روشنی کا انتظام نہ ہونے کے سبب تیندوا بچے کو اپنے ساتھ لیجانے میں کامیاب ہوا۔

نزدیکی جنگل میں خون کے دھبے دیکھے گئے ہیں جس سے شبہ ظاہر کیا جاتا ہے کہ بچہ تیندوے کا شکار بن گیا ہے۔

پولیس اور محکمہ وائلڈ لائف نے مشترکہ طور بچے کی تلاش کا کام ہاتھ میں لیا ہے۔ سابق سرپنچ محمد جبار کا کہنا ہے کہ متاثرہ کنبہ نے کئی ماہ قبل یہاں تھوڑی سی زمین لے کر عارضی آشیانہ بناکر رہائش اختیار کی۔

رقومات کی عدم دستیابی کے باعث پکا مکان نہ ہونے کی وجہ سے یہ حادثہ پیش آیا ہے۔ انہوں نے سرکار سے متاثرہ کنبہ کی مالی معاونت کی اپیل کی ہے۔