غلام محمد سروری آر اینڈ بی منسٹر اور کشتواڑ ضلع کے حلقہ اندروال سے ایم ایل اے رہ چُکے ہیں۔
ذرائع سے ملی جانکاری کے مطابق ایجنسی کو شبہ ہے کہ وہ (غلام محمد سروری) مبینہ طور پر عسکریت پسندوں کے ساتھ رابطے میں ہیں اور اس سلسلے میں ایجنسی نے انہیں پوچھ گچھ کے لیے طلب کیا ہے۔
سروری کو غلام نبی آزاد کا قریبی مانا جاتا ہے۔
واضح رہے کہ معطل شدہ پولیس افسر دیویندر سنگھ کی گرفتاری کے بعد این آئی اے کی متعدد ٹیموں نے جموں و کشمیر کا رُخ کیا ہے اور کئی مقامات پر چھاپے مارے ہیں۔
دیویندر سنگھ کو 11 جنوری کو عسکریت پسند کمانڈر نوید بابو اور ان کے ساتھی کے ساتھ اس وقت گرفتار کیا گیا تھا، جب وہ جموں کی طرف جا رہے تھے۔
اس کیس کو این آئی اے کو سونپ دینے کے بعد ایجنسی نے جنوبی کشمیر میں بھی چھاپے مارے ہیں۔
دیویندر سنگھ کے آبائی علاقہ ترال کے علاوہ شوپیاں اور کولگام میں بھی چھاپا مارا گیا۔ شمالی کشمیر کے ہندوارہ علاقے میں چھاپہ مار کارروائی کرتے ہوئے ایک سرکاری ملازم کے گھر سے لیپ ٹاپ، موبائل فون اور گاڑی کے دستاویزات ضبط کیے گئے تھے۔
