کرناٹک کے ضلع یادگیر کی مسجد رحمانیہ اسٹیشن روڈ یادگیر میں جلسہ میلاد النبیﷺ کا انعقاد عمل میں آیا۔ اس موقع پر مولانا حافظ سید قاسم بخاری قادری گلبرگہ نے مہمان مقرر کے طور پر خطاب کرتے ہوئے کہا کہ حضورﷺ کی ولادت کی خوشی باعث اجر و ثواب ہے۔
ہر زمانے میں ہر دور میں ہر علاقے اور زمین کے ہر خطے میں حضور اکرم ﷺ کی ولادت کی خوشی منائی گئی۔ منانے کے طریقے اور انداز الگ تھے مگر میلاد کا اہتمام ضرور ہوا ہے۔
انہوں نے کہا کہ ہم میلاد کا بھی اہتمام کریں اور سرکار کی سیرت بھی اپنائیں کیونکہ ساری انسانیت کے لیے حضور ﷺکی حیات طیبہ ایک بہترین نمونہ ہے۔
اللہ تعالی نے حضور کی ذات و صفات کو عظیم بے مثل و بے مثال بنایا ہے۔ میلاد پر خوشیوں کا اظہار فطری ہے۔ حضورﷺ کی آمد پر خدا کا بہت بڑا احسان ہے۔
اس موقع پر مولانا حافظ و قاری محمد صادق نقشبندی خطیب و امام مسجد چوک یادگیر نے بھی جلسے سے خطاب کیا۔ اس جلسہ کی نظامت محمد عبد اللہ نقشبندی خطیب و امام مسجد رحمانیہ اسٹیشن روڈ یادگیر نے کی۔
یہ بھی پڑھیں:یادگیر: حضرت سید شاہ یعقوب بخاری قادریؒ کا 559واں سالانہ عرس
شفیع الدین بندہ نوازی نے بارگاہ رسالت مآبﷺمیں سلام پیش کیا۔ بعدازاں فاتحہ خوانی ہوئی اور حاضرین میں تبرکات تقسیم کیے گئے۔
اس موقع پر انتظامی کمیٹی نے تمام مہمانوں کی گل پوشی و شال پوشی کی۔
