ریاست کرناٹک کے شہر یادگیر میں ڈسٹرکٹ سیشن جج سدھارتھ نے آٹو رکشا کے ذریعے ویکسین بیداری مہم کا افتتاح کیا۔
اس موقع پر انہوں نے کہا کہ کورونا سے محفوظ رہنے کے لئے ٹیکہ لگانا نہایت ضروری ہے۔ لوگوں میں ویکسینیشن کو لے کر زیادہ معلومات نہیں ہے جس کی وجہ سے اس طرح کے خصوصی بیداری مہم چلانے کی ضرورت ہے تاکہ لوگوں کو اس وبا سے بچنے کے لیے ریاستی حکومت اور محکمہ صحت کی جانب سے بتائے گئے اقدامات پر عمل کرنے کی سخت ضرورت ہے۔
انہوں نے عوام سے اپیل کرتے ہوئے کہا کہ اپنی صحت کا خاص خیال رکھیں۔ گھر کے تمام احباب جو 18 سال سے زائد عمر کے ہیں وہ تمام لوگ ویکسین ضرور لیں۔ گھر سے باہر نکلتے وقت ماسک لگا کر نکلے سماجی فاصلے کا خیال رکھیں۔
مزید پڑھیں:
آئی سی ایم آر اس ماہ چوتھا سیرو سروے شروع کرے گا
انہوں نے مزید کہا کہ عوامی مقامات پر لوگ ماسک کا استعمال نہیں کر رہے ہیں جبکہ حکومت کی جانب سے ماسک لگانے کی بار بار تاکید کی جارہی ہے۔ عوام کو چاہیے کہ وہ حکومت کی جانب سے بتائے گئے احتیاطی اقدامات پر سختی سے عمل کریں اور ضلعی انتظامیہ کا تعاون کریں۔
