بیدر (کرناٹک): بیدر ضلع کمشنر گویندر ریڈی نے بیدر ضلع میں 3 ستمبر کو منعقد ہونے والے کرناٹک ٹیچر اہلیتی امتحان (ٹی ای ٹی) کے ہموار انعقاد کو یقینی بنانے کے لیے متعلقہ افسران کو کارروائی کرنے کی ہدایت دی۔ وہ ضلع کمشنر کے دفتر کے ہال میں 3 ستمبر کو منعقد ہونے والے کرناٹک اہلیتی امتحان کی تیاری کے اجلاس کی صدارت کر رہے تھے۔ انہوں نے کہا کہ امتحان بیدر ضلع کے 32 امتحانی مراکز میں منعقد ہوگا۔ امتحان کے دوران 9654 امیدوار شرکت کرنے والے ہیں، امیدواروں کو کسی قسم کی پریشانی کا سامنا نہیں کرنا پڑے گا۔ افسران کو آپس میں مل کر کام کرنا چاہیے۔
ضلع پنچایت کی چیف ایگزیکٹیو آفیسر شلپا ایم نے کہا کہ افسران اور عملہ کو ان کو تفویض کردہ کام کو صحیح طریقے سے انجام دینا چاہیے۔ انہوں نے کہا کہ یہ تمام متعلقہ عہدیداروں اور عملے کی ذمہ داری ہے کہ وہ امتحان کے منظم انعقاد کو یقینی بنائیں۔ ایڈیشنل سپرنٹنڈنٹ آف پولیس مہیش میگھنور نے کہا کہ تمام امتحانی مراکز پر پولس سیکورٹی کی جائے گی۔ انہوں نے کہا کہ روٹ اہلکاروں کی گاڑی کے پیچھے ایک ایسکارٹ گاڑی فراہم کی جائے گی۔
یہ بھی پڑھیں: Ro Ba Ro Help Line ورنگل میں روبرو ہیلپ لائن سینٹر کا قیام
اس میٹنگ میں محکمہ اسکول ایجوکیشن کے ڈپٹی ڈائرکٹر سلیم پاشا، اسکول ایجوکیشن ڈپارٹمنٹ کے انگلش لینگویج سبجیکٹ انسپکٹر سید فرخان پاشا، ٹی ای ٹی ایگزامینیشن نوڈل آفیسر گنڈپا چیف سپرنٹنڈنٹ آف ایگزامینیشن سینٹر اور اسٹیٹ ویجیلنس افسران موجود تھے۔
