ریاست کرناٹک کے شہر یادگیر میں بجلی کی آنکھ مچولی جاری ہے۔ اس پر ستم یہ ہے کے بجلی کی کٹوتی کا کوئی وقت مقرر نہیں ہے۔ جب چاہے بجلی کاٹ دی جاتی ہے جس کی وجہ سے شہریوں کو کئی مسائل کا سامنا کرنا پڑ رہا ہے۔ صبح، دوپہر اور شام کے اوقات میں کئی بار منقطع ہو جاتی ہے۔ خاص کر جب غیر موسمی بارش ہوتی ہے یا تیز ہوا چلتی ہے۔
بجلی کی فراہمی میں بار بار خلل سے عوام بالخصوص تاجروں اور طلباء کو سخت مشکلات کا سامنا کرنا پڑ رہا ہے۔ اس پر ستم یہ ہے کہ جب بجلی کی فراہمی منقطع ہو جاتی ہے تو عوام کی جانب سے متعلقہ محکمہ کو فون کیا جاتا ہے تو فون کی گھنٹی تو بجتی ہے مگر فون اٹھانے والا کوئی نہیں ہوتا ہے۔ جبکہ صارفین کی جانب سے بل ادا کرنے میں تھوڑی سی دیر ہو جائے تو فوری کنکشن منقطع کر دیا جاتا ہے۔
ایک جانب محکمہ بجلی عوام کو دن بھر بجلی کی فراہمی کرنے میں ناکام ہے تو دوسری جانب محکمہ کی لاپرواہی کی منہ بولتی تصویر یادگیر وارڈ نمبر 12 اور 13 کے اسٹریٹ لائٹ دن میں بھی چالو رہتے ہیں۔ محکمہ کی لاپرواہی سے بجلی جیسی اہم ضروریات کی وجہ سے زندگی ضائع ہو رہی ہے۔ محکمہ بجلی کو چاہیے کہ ایسے معاملے کو جلد ازجلد درست کرلیں تاکہ شہریوں کو پریشانی نہ ہو۔
