کرناٹک کے گلبرگہ شہر میں نداف پنجار ایسوسی ایشن کی جانب سے ضلع کمشنر کے دفتر کے سامنے احتجاجی مظاہرہ کیا گیا۔
اس موقع پر نداف پنجار ایسوسی ایشن گلبرگہ ضلع کے صدر مولا علی نے کہا کہ پورے کرناٹک میں نداف پنجار طبقے کے کئی لوگ موجود ہیں۔ مسلمانوں میں کچھ ایسے طبقے ہیں، جن میں نداف پنجار منصوری طبقے کے لوگ انتہائی پسماندگی کا شکار ہیں۔ اس طبقے کی ترقی کے لئے ہم ریاست میں الگ سے نداف، پنجار ڈیولپمنٹ کارپوریشن کے قیام کا مطالبہ کر رہے ہیں۔
نداف پنجار طبقے کے طلباء کو اسکول، کالج اور ہاسٹل کی سہولیات حاصل کر نے کے لئے انھیں سرکاری دفتر سے نداف پنجار سند حاصل کرنے میں بھی کئی مشکلات سے گزرنا پڑرہا ہے۔ اس لیے انہوں نے ریاستی حکومت سے مطالبہ کیا ہے کہ انھیں مینار ٹی ڈیولپمنٹ کارپوریشن کی طرح نداف پنجار کے لئے بھی علیحدہ ڈیولپمنٹ کارپوریشن کا قیام کریں۔ تاکہ انھیں بھی تعلیمی اور سماجی میدان میں ترقی کرنے کے لئے سرکاری اسکیمس کی سہولت مل سکے۔
