بنگلور: ہیومین ٹچ شہر کا وہ معروف ادارہ ہے جو پچھلے 15 سالوں سے غرباء و مساکین کی اجتماعی شادیاں اس مقصد سے کرواتا آرہا ہے کہ ان کی نہ صرف امداد ہو بلکہ سماج میں پھیلی برائیاں جیسے جہیز کی لعنت، غیر دینی رسومات و فضول اخراجات وغیرہ کا سد باب کیا جاسکے۔
آج ایک مثالی شادی کا انعقاد عمل میں آیا جہاں شہر کے معزز عبد اللہ کے صاحبزادے کی شادی تھی ۔ انہوں نے اس موقع پر اپنے بیٹے کی شادی کے ساتھ ہیومین ٹچ این. جی. آو کی مدد سے 10 غریب جوڑوں کی شادی کا بھی اہتمام کیا۔
محترمہ تزین عمر ہیومین ٹچ کی سربراہ ہیں جن کی زیر نگرانی اجتماعی شادیوں انجام پاتی ہیں۔ شادی شدہ جوڑوں کو گھر کی ضرورت کا سامان بھی مہیا کیا جاتا ہے۔
اس موقع پر محترمہ تزین عمر نے کہا کہ کیا ہی بہتر ہو کہ اس طرح کے کار خیر عام ہوجائیں کہ جب بھی کسی مالدار کے گھر شادی ہو اور وہ ایسا انتظام کرے کہ ساتھ ہی چند غریب جوڑوں کی شادی کا بھی اہتمام ہو۔ اس سے نہ صرف ان غریب خاندانوں کی مدد ہوگی بلکہ سماجی برائیوں پر بھی روک لگے گی۔
