بیدر: کرناٹک گورنمنٹ ایمپلائز اسوسی ایشن بیدر کی جانب سے ڈسٹرکٹ گورنمنٹ ایمپلائز بھون میں 80 سال سے زیادہ عمر کے ریٹائرڈ ملازمین کو اعزاز دینے کی تقریب کا افتتاح سوریہ کانت ناگامارپلی نے شمع روشن کر کے کیا۔ اس موقع پر گروپدپا ناگا ماراپلی اسپتال کے صدر سوریہ کانت ناگاماراپلی نے کہا کہ بزرگوں کی رہنمائی ہم سب کے لیے مشعل راہ ھے، ساتھ ہی ریٹائرڈ ملازمین کی خدمات بھی انمول ہیں۔ بیدر شمال کے رکن اسمبلی رحیم خان جنہوں نے مہمان خصوصی کے طور پر شرکت کی اور اپنے خطاب میں انہوں نے کہا کہ ہم آپ کے ساتھ ہیں اور آپ کو کسی بھی وجہ سے کسی قسم کی پریشانی ہو یا کوئی بھی مسئلہ درپیش ہو تو ہم سے ربط کریں ہم اسے حل کرنے کی ہر ممکن کوشش کریں گے۔
بیدر جنوب حلقہ کے ایم ایل اے بنڈپا قاسم پور نے کہا کہ وہ ایوان کو ملازمین کو دستیاب سہولیات کے بارے میں قائل کریں گے اور آپ کو دستیاب تمام سہولیات فراہم کرنے کی دیانتداری سے کوشش کریں گے۔ کرناٹک اسٹیٹ گورنمنٹ ریٹائرڈ ایمپلائیز اسوسی ایشن کے سینئر نائب صدر سوریہ کانت کدم جنہوں نے بطور مہمان خصوصی شرکت کی، انہوں نے کہا کہ ہمارے ریٹائرڈ احباب کو تمام سہولیات دی جائے، ورنہ ہمیں لڑائی لڑنی پڑے گی۔ سرکاری ملازمین کی اسوسی ایشن کے صدر راجندر کمار گندگے نے پروگرام میں بات کرتے ہوئے کہا کہ حکومت کو پہلے ہی ساتویں پے کمیشن اور سابقہ پنشن کو لاگو کرنے کی ہدایت دی گئی ہے۔ اس میں ناکامی پر مختلف محکموں کے سرکاری ملازمین اور پنشنرز نے احتجاج کرنے کا فیصلہ کیا ہے۔ اس اجلاس میں کاشی ناتھ، نائب صدر سدنا، محمد رشید، دیویندرپا، سید علیم الدین، دتاتری کلکرنی، پریتم، سری ملاپا، یوسف ہاشمی، شیوانند گٹی، بی۔ دشرتھ اور دیگر نے شرکت کی۔
