ریاست کرناٹک کے دارالحکومت بنگلور سمیت نہ صرف بھارت میں بلکہ پوری دنیا میں عالمی وبا کورونا وائرس کا انفیکشن ابھی تھما نہیں ہے اور ایسے میں عازمین حج تذبذب میں ہیں کہ آئندہ حج سے متعلق کیا کیا جائے۔
واضح رہے کہ ابھی تک اس ضمن میں حکومت سعودی عرب اور حکومت ہند کی جانب سے کوئی واضح ہدایات نہیں جاری کی گئی ہیں۔
حکومت ہند و مرکزی حج کمیٹی کی جانب سے حج 2021 کے متعلق جو ہدایات جاری کی گئی ہیں وہ صرف حکومت کے کوٹے سے تعلق رکھتی ہیں نہ کہ نجی طور پر حج پر سفر کرنے والوں کے لیے۔
اس موضوع پر ای ٹی وی بھارت سے خصوصی گفتگو کرتے ہوئے کرناٹک حج آرگنائزر ایسوسی ایشن کے چیئرمین اقبال احمد صدیقی نے بتایا کہ حکومت ہند کی جانب سے عازمین حج 2021 کے لیے جو بوکنگز کی گئی ہیں وہ حکومت کے کوٹے سے متعلق رکھتی ہیں اور یہ کہ اس کارروائی کا نجی طور پر سفر کرنے والے عازمین حج 2021 سے کوئی تعلق نہیں ہیں۔
انہوں نے بتایا کہ حج 2021 کے متعلق اب تک حکومت سعودی عرب کی جانب سے کوئی ہدایات موصول نہیں ہوئی ہیں لہذا نجی طور پر حج کرنے والے حضرات ان رہنما ہدایات کا صبر و تحمل کے ساتھ انتظار کریں۔
اقبال احمد صدیقی نے عازمین حج 2021 سے اپیل کی کہ وہ کسی بھی حج ٹور آپریٹرز سے ایڈوانس بولنگ ہرگز نہ کریں کیوں کہ ایسے دھوکہ ہوسکتا ہے۔
انہوں نے کہا کہ اگر کہیں اس تعلق سے کوئی اشتہار دیکھیں تو پولیس کو اطلاع کریں یا کرناٹک حج آرگنائزرز ایسوسی ایشن سے رابطہ کریں کہ ایسے ٹور آپریٹرز یا ایجنٹس پر قانونی کارروائی کی جاسکے۔
انہوں نے مزید بتایا کہ اس ضمن میں عازمین حج 2021 سے کسی قسم کا کوئی دھوکہ نہ ہو۔
انہوں نے بنگلور پولیس کمشنر سے اس تعلق سے تفصیلی شکایت درج کی ہے جس کے نتیجے میں پولیس کمشنریٹ میں ایک خصوصی سیل کا قیام کیا گیا ہے۔
