نئی دہلی: کانگریس نے یوکرین میں بھارتی طالب علم نوین کی موت پر گہرے دکھ کا اظہار کرتے ہوئے اس کیلئے حکومت کو ذمہ دار ٹھہرایا اور کہاکہ اس نے بروقت ملک کے شہریوں کو نکالنے میں کوتاہی برتی۔
کانگریس کی ترجمان ڈاکٹرراگنی نائک نے منگل کو پارٹی ہیڈکوارٹر میں خصوصی پریس کانفرنس میں کہاکہ نوین کی موت کے لئے ہندستانی حکومت ذمہ دار ہے۔ اس نے بروقت قدم اٹھایا ہوتا تو ملک کے ایک ہونہار طالب کو کھونا نہیں پڑتا۔ انہوں نے کچھ طلبا کو اغوا کئے جانے کی خبروں پر بھی تشویش کا اظہار کیا۔
کانگریس کے سابق صدر راہل گاندھی اور پارٹی کی جنرل سکریٹری پرینکا گاندھی واڈرا نے بھی نوین کی موت پر گہرے صدمے کا اظہار کرتے ہوئے کہاکہ حکومت کو یوکرین سے ہندستانی طلبا کو لانے کے لئے ٹھوس حکمت عملی بنانی چاہئے اور اس منصوبہ کی معلومات طلبا اور انکے کے اہل خانہ کے ساتھ شیئر بھی کرنی چاہئے۔
مزید پڑھیں:
گاندھی نے ٹوئٹ کرکے کہاکہ ایک ہندستانی طالب علم نوین کی یوکرین میں موت کی افسوسناک خبر ملی۔ میری ان کے کنبہ کے اراکین اور دوستوں کے ساتھ تعزیت۔ میں پھر کہتا ہوں کہ ہندستانی حکومت کو پھنسے ہوئے طلبا کی بحفاظت واپسی کے لئے اسٹریٹجک منصوبہ کے تحت کام کرنے کی ضرورت ہے۔ اس کام کے لئے ہر منٹ قیمتی ہے۔
محترمہ واڈرا نے کہا کہ یوکرین میں پھنسے ہندستانی طالب علم نوین کی موت کی خبر دکھ دینے والی ہے۔ ان کے کنبوں کے ساتھ میری گہری تعزیت۔ بھگوان انہیں اس دکھ کے وقت میں ہمت دے۔ میری حکومت سے درخواست ہے کہ ہر ممکن کوشش کرکے جلد از جلد ہمارے تمام طلبا کو واپس لایا جائے۔
یو این آئی۔
