ریاست کرناٹک کے دارالحکومت بنگلور میں آج بھارت بند میں کئی سماجی اور سیاسی تنظیموں نے شرکت کی اور مرکزی حکومت کے خلاف شدید نعرے بازی کی۔ کسانوں کی جانب سے کال دیے گئے اس بھارت بند کو کانگریس اور جے ڈی ایس پارٹی کی حمایت حاصل رہی جب کہ ایس ڈی پی آئی اور ویلفیئر پارٹی کے لیڈران نے احتجاجی ریلی میں حصہ لیا۔
بھارت بند کے سلسلے میں بات کرتے ہوئے کسان رہنما نے بتایا کہ 'مودی حکومت کو زرعی قوانین واپس لینے ہوں گے ورنہ اس کالے قوانین کے خلاف آندولن زور و شور سے چلتا رہے گا۔
سماجی کارکنان کا کہنا ہے کہ 'بھارتیہ جنتا پارٹی نے مغربی بنگال کے نتائج دیکھے ہیں اور اتر پردیش کے بھی ایسے ہی نتائج دیکھیں گی اور اسی طرح مرکز سے بھی وہ برخاست کردی جائے گی۔'
یہ بھی پڑھیں: بھارت بند پر اتراکھنڈ میں کانگریس نے کیا چکہ جام
بھارت بند کے دوران بنگلورو میں عام زندگی پر کوئی خاص اثر نہیں پڑا، سرکاری بسیں چل رہی تھی، سرکاری دفاتیر و نجی ادارے بھی کھلے رہے تاہم احتجاجی ریلی میں ہزاروں کی تعداد میں کسانوں نے شرکت کی۔
واضح رہے کہ کسان گزشتہ 10 ماہ سے مرکزی حکومت کی جانب سے لائے گئے تینوں زرعی قوانین کے خلاف احتجاج کررہے ہیں۔
