یادگیر میں قدیم سڑک کی مرمت کا مطالبہ

یادگیر میں گزشتہ چار دنوں سے ہو رہی مسلسل بارش سے جہاں ایک جانب ندیوں اور تالابوں کی سطح میں اضافہ ہوا ہے تو دوسری جانب ڈرین کا پانی سڑکوں پر آنے کی وجہ سے عام لوگوں کو کافی دشواری پیش آ رہی ہے۔

ریاست کرناٹک کے ضلع یادگیر شہر کی قدیم سڑک اپنا میڈیکل سے گاندھی چوک تک جاتی ہے۔ بارش کے دنوں میں اس سڑک سے چلنا نہایت دشوار ہو جاتا ہے جس کی وجہ سے یہاں سے گزرنے والی گاڑیوں اور دکانداروں کو کافی مشکلات کا سامنا کرنا پڑتا ہے۔

وہیں کرناٹک کے مسلم یوتھ کمیٹی کے صدر ذاکر احمد نے میڈیا سے بات کرتے ہوئے کہا کہ اپنا میڈیکل سے گاندھی چوک جانے والی یہ قدیم سڑک کئی سالوں سے مرمت کی منتظر ہے، کئی بار ضلع انتظامیہ اور متعلقہ محکمہ کی یقین دہانی کے باوجود اس سڑک کا کام نہیں ہوا۔

انہوں نے ضلعی انتظامیہ اور محکمہ بلدیہ کے ذمہ داران سے اپیل کرتے ہوئے کہا کہ اپنا میڈیکل سے گاندھی چوک تک جانے والی اس قدیم اور مصروف ترین سڑک کا کام جلد از جلد کیا جائے۔

انہوں نے کہا کہ محکمۂ بلدیہ اور ضلع انتظامیہ اگر اس پر توجہ نہیں دیتا ہے تو ہمیں مجبوراً اس سڑک کو بند کر کے احتجاج کرنا پڑے گا۔