بنگلور: ریاست کرناٹک میں بی جے پی حکومت کی بدعنوانی کے خلاف عوامی بیداری پیدا کرنے کے لیے، کرناٹک کانگریس پارٹی کی جانب سے بتاریخ 23.01.2023 کو صبح 10.00 بجے سے دوپہر 12.00 بجے تک بنگلور کے 300 سے زیادہ مقامات پر "کرپشن ختم کرو، بنگلور بچاؤ" نعرے کے ساتھ پرزور احتجاجات کا اہتمام کیا گیا ہے. کرناٹک کانگریس کے لیڈران نے ایک اخباری بیان میں بتایا کہ آل انڈیا کانگریس کمیٹی کے جنرل سکریٹری رندیپ سنگھ سرجے والا، کرناٹک کانگریس کے صدر ڈی کے. شیوکمار، کرناٹک اسمبلی کے اپوزیشن لیڈر سدارامیہ، کرناٹک لیجسلیٹیو کونسل کے اپوزیشن لیڈر بی کے ہری پرساد، کے پی سی سی کے ورکنگ پریذیڈنٹ سمیت کئی لیڈر احتجاج میں شرکت کریں گے۔
یہ بھی پڑھیں:
بتایا گیا ہے کہ یہ احتجاج ریاست میں سی ایم بسواراج بومائی کی قیادت والی بھارتیہ جنتا پارٹی حکومت کے خلاف ہے جو کہ بدعنوانی اور دیگر مسائل پر آواز اٹھائے گا۔ یاد رہے کہ ریاست کرناٹک میں برسر اقتدار بھارتیہ جنتا پارٹی کی حکومت 40 فیصد کمیشن خوری کے سنگین الزامات کا سامنا کر رہی ہے اور ساتھ ہی اپوزیشن کانگریس کی جانب سے بی جے پی حکومت کی بدعنوانی کے خلاف پے سی. ایم کیمپین بھی چلایا گیا۔ میڈیا سے بات کرتے ہوئے ایم ایل اے این اے حارث نے نامہ نگاروں کو بتایا کہ، "بی جے پی حکومت بدعنوانی کے الزامات کا جواب دینے کے لیے تیار نہیں ہے. ہم نے اب اس کے خلاف احتجاج شروع کرنے اور اس کے خلاف لڑنے کا فیصلہ کیا ہے. ہمارا احتجاج بنگلورو میں 300 سے زیادہ مقامات پر منعقد کیا جائے گا"۔ آل انڈیا کانگریس کمیٹی کے سکریٹری ابھیشیک دت بھی ایم ایل اے این اے ہیرس کے ساتھ کرناٹک کانگریس کی کانفرنس میں موجود رہے۔
