ریاست کرناٹک کے ضلع یادگیر کے مدنپورہ علاقے میں گندگی کا ڈھیر لگا ہوا ہے جس کی وجہ سے محکمہ بلدیہ کی لاپروائی صاف نظر آرہی ہے۔
واضح رہے کہ بارش کے موسم میں جب بھی بارش ہوتی ہے مدنپورہ کے پورے علاقے میں گندگی کے سبب بدبو پھیلتی جاتی ہے۔
مقامی باشندوں کے محکمہ بلدیہ سے کئی بار توجہ دلانے کے باوجود بھی محکمہ بلدیہ کوئی ٹھوس اقدام نہیں اٹھا رہا ہے۔۔
مقامی دکاندار محبوب پاشا نے محکمہ بلدیہ سے اپیل کرتے ہوئے کہا کہ ہماری دکانوں کے سامنے موجود اس گندگی کو جلد سے جلد صاف کیا جائے، اور مقامی لوگوں کو کچرا ڈالنے کے لیے ایک کنٹینر یعنی کچرا دان رکھا جائے۔
انہوں نے کہا کہ بلدیہ کی جانب سے مکمل صفائی نہ ہونے کی وجہ سے مقامی لوگوں کو کافی مشکلات کا سامنا کرنا پڑ رہا ہے۔
واضح رہے کہ مدنپورہ کے مقامی باشندوں نے ایک پریس کانفرنس کا بھی انعقاد کیا جس میں مقامی باشندہ آنند نے بتایا کہ سوچھ بھارت ابھیان کے تحت لوگوں کو صاف صفائی رکھنے اور کرنے کی ہدایت دی جاتی ہے، باوجود اس کے لوگ ابھی بھی اس پر عمل نہیں کررہے ہیں۔
انہوں نے مدنپورہ علاقے میں محکمہ بلدیہ کی لاپرواہی پر ناراضگی کا اظہار کیا۔
پریس کانفرنس سے خطاب کرتے ہوئے مقامی باشندہ عثمان نے بھی کہا کہ محکمہ بلدیہ مدنپورہ میں جلد از جلد صفائی کا انتظام کرے، اور وہاں کے ڈرین کی بھی صفائی کی جائے۔
انہوں نے کہا کہ مقامی افراد کو کچرا ڈالنے کے لیے کچرا دان کا انتظام کیا جائے، اس موقع پر مدنپورہ علاقے کے دیگر احباب بھی موجود تھے۔
