سرسی (کرناٹک): کرناٹک کے سماجی بہبود کے محکمے نے اس سال کے کیلاڈی چنمما شوریہ ایوارڈ کا اعلان کیا ہے جس میں کوسلیا وینکٹ رامنا ہیگڑے نام کی ایک لڑکی کا نام شامل ہے۔ اتر کنڑ کے سداپور تعلقہ میں کناسور کی اس لڑکی نے ایک حادثے میں اپنے والد کی جان بچائی تھی۔ 15 مارچ 2021 کو یہ لڑکی اپنے والد کے ساتھ قریبی گاؤں میں ایک پروگرام کے لیے جیپ میں جا رہی تھی۔ اس دوران جیپ حادثاتی طور پر اُلٹ گئی۔ والد وینکٹ رامنا ہیگڑے جیپ کے نیچے پھنس گئے تھے۔ اس موقع پر کوسلیا ہیگڑے اور ان کے پانچ سالہ بھائی نے جو جیپ میں سوار تھے، اپنے والد کو بچانے کی کوشش کی لیکن ناکام رہے۔ اس کے بعد وہ اپنے والد کو بچانے کے لیے تقریباً دو کلومیٹر تک بھاگی اور اس نے لوگوں کو بلا کر اپنے والد کی جان بچائی۔ حکومت وقت نے اب لڑکی کو ایوارڈ سے نوازا ہے اور اس سال اس بچی کو کیلاڈی چنمما شوریہ ایوارڈ سے نوازا گیا ہے، جو ہر سال 14 نومبر کے یوم اطفال پر بہادری کا مظاہرہ کرنے والے بچوں کو دیا جاتا ہے۔
واضح رہے کہ کوسلیا وینکٹ رامنا ہیگڑے سدا پور تعلقہ کے کناسور کے گورنمنٹ سیکنڈری پرائمری اسکول میں ساتویں جماعت میں زیر تعلیم ہیں۔ کناسور کے لوگوں نے لڑکی کو اتنی کم عمر میں شوریہ ایوارڈ(بہادری تمغہ) حاصل کرنے پر مبارکباد دی ہے۔ Girl Gets Keladi Chennamma Shaurya Award
