حیدرآباد: آندھرا پردیش سے تعلق رکھنے والے 12 افراد کرناٹک میں پیش آئے سڑک حادثہ میں ہلاک ہوگئے۔ یہ حادثہ پڑوسی ریاست کے چکبل پور ٹاون کے ٹریفک پولیس اسٹیشن کے قریب اُس وقت پیش آیا جب ان کی ٹاٹا سومو چلانے والے نے اس کا توازن کھودیا اور یہ گاڑی، ٹہری ہوئی سمنٹ کی لاری سے ٹکرا گئی۔ اس حادثہ میں 12 افراد ہلاک اور دیگر تین شدید زخمی ہوگئے۔ یہ افراد ٹاٹا سومو گاڑی میں بنگلور کی سمت جارہے تھے۔ گاڑی میں 18 افراد سفر کررہے تھے۔ تین زخمیوں کی حالت تشویشناک بتائی جاتی ہے۔
مہلوکین کا تعلق آندھرا پردیش کے ستیہ سائی ضلع کے گورنٹلہ منڈل سے بتایاجاتا ہے۔ پولیس کے مطابق کہر کی وجہ سے یہ حادثہ پیش آیا۔ مہلوکین میں دو خواتین شامل ہیں۔ پولیس نے کہا کہ مہلوکین کا تعلق ستیہ سائی ضلع سے ہے تاہم وہ بنگلور کے ہونگاسندرا میں مقیم تھے۔ حادثہ اتنا شدید تھا کہ 5 افراد موقع پر ہی ہلاک ہوگئے جبکہ دیگر 7 کی اسپتال منتقلی کے دوران موت ہوگئی۔ حادثہ کے اثر سے گاڑی کے دروازے جام ہوگئے۔ مقامی افراد اور پولیس کو ان دروازوں کو کاٹنا پڑا تاکہ پھنسے ہوئے افراد کو نکالا جا سکے۔
یو این آئی
