جھارکھنڈ میں بوکارو ضلع کے ہرلا تھانہ علاقہ میں قرض واپس مانگنے پر بدمعاشوں نے ایک نوجوان کو گولی مار کر شدید زخمی کر دیا ۔
پولیس ذرائع نے آج بتایاکہ سیکٹر آٹھ باشندہ انیل گواسکر نے بالی ڈیہہ تھانہ علاقہ کے گولا بالی باشندہ راجن سنگھ کو قریب پانچ لاکھ روپے قرض دیا تھا۔ انیل اتوار کی صبح راجن سنگھ سے روپے مانگنے اس کے گھر گیا تھا۔ راجن نے انیل کو پانچ ہزار روپے دیئے جسے لیکر وہ واپس گھر لوٹ آیا۔
ذرائع نے بتایاکہ انیل کے گھر اتوار دیر شام تین بدمعاشوں نے دھاوا بول کر اسے پکڑ لیا اور اسے نزدیک سے گولی مار دی ۔ گولی کی آوازسن کر کنبہ کے افراد وہاں پہنچے اور انیل کو فوراً بوکارو جنرل اسپتال میں داخل کرایا جہاں اس کی حالت نازک ہے۔
اس سلسلے میں راجن سنگھ سمیت دیگر کے خلاف متعلقہ تھانہ میں ایک ایف آئی آر درج کرائی گئی ہے ۔ معاملے کی تفتیش کی جارہی ہے ۔
