جموں کے پریس کلب میں نیشنل پینتھرز پارٹی نے ایک پریس کانفرنس کا انعقاد کیا جس میں انہوں نے آئندہ اسمبلی انتخابات میں ریاست کی تمام 87 اسمبلی نشستوں پر اپنے امیدوار اتارنے کا اعلان کیا ہے۔
پریس کانفرنس کے دوران بھیم سنگھ نے ریاست جموں و کشمیر کو بھارت کا ’’اٹوٹ انگ‘‘ قرار دیتے ہوئے اس بات پر زور دیا کہ ’’پورے ملک میں کنیاکماری سے لیکر کشمیر تک ایک آئین اور ایک جھنڈا ہونا چاہئے۔‘‘
بھیم سنگھ نے دفعہ 35اے کو غیر آئینی اور غیر قانونی قرار دیتے ہوئے کہا کہ ’’دفعہ 35اے ریاستی عوام کو بھارتی شہریت اور حقوق سے محروم رکھتا ہے۔‘‘
انکا کہنا تھا کہ 1953میں 35اے کو صدارتی حکمنامے کے تحت آئین میں داخل کیا گیا تھا جو محض چھ مہینوں تک ہی مستند رہتا ہے۔
بھیم سنگھ کے مطابق ’’دفعہ 35اے اور 370سے متعلق عدالتی عظمی میں عرضیاں دائر کی جا چکی ہیں اور ہمیں عدالتی فیصلے کا انتظار کرنا چاہئے۔‘‘
دریں اثناء پروفیسر بھیم سنگھ نے ریاستی انتظامیہ پر زور دیا کہ سبھی سیاستی جماعتوں کے کارکنان کو الیکشن کے دوران مناسب اور پختہ سیکورٹی فراہم کی جانی چاہئے۔
