پیپلز ڈیموکرٹیک پارٹی کی صدر اور سابق وزیراعلیٰ محبوبہ مفتی پارٹی کارکنان سے ملاقات کرنے کی غرض سے آج سے یعنی 9 جولائی سے تین روزہ دورے پر جموں پہنچیں گی، جہاں وہ جموں خطے کے پارٹی رہنماؤں و کارکنان سے ملاقات کریں گی۔
پیپلز ڈیموکریٹک پارٹی کے نائب صدر و جموں خطہ کے انچارج عبد الحمید چودھری نے پارٹی صدر محبوبہ مفتی کے جموں دورے کے بارے میں تفصیلات فراہم کرتے ہوئے کہا کہ 'محبوبہ مفتی 9 جولائی، 10 اور 11 جولائی کو پی ڈی پی دفتر گاندھی نگر میں جموں میں پارٹی کارکنان سے خطاب کریں گی۔ بعد ازاں جموں خطہ کے پارٹی رہنماؤں کے ساتھ میٹنگ بھی منعقد ہو گی۔'
ان کے مطابق میٹنگ میں پارٹی کے امور اور مستقبل کے لائحہ عمل کے بارے میں فیصلہ لیا جائے گا۔ انہوں نے مزید کہا کہ محبوبہ مفتی آنے والے دنوں میں جموں کے مختلف علاقوں کا دورہ کر کے پارٹی کے لیڈران و کارکنان سے ملاقات کریں گی۔ وہیں، جموں کے پارٹی دفتر کے باہر پی ڈی پی لیڈران کی آمد صبح سے شروع ہوئی ہے۔
