جموں (جموں و کشمیر) : ’’آئی آئی آئی ایم جموں میں بھنگ سے تیار کی جانے والی دوا ’لیوینڈر‘ کی طرح ملک میں ایک مثال قائم ہو گی۔‘‘ اس بات کا اظہار مرکزی وزیر مملکت ڈاکٹر جتیندر سنگھ نے کیا۔ انہوں نے کہا کہ ’’بھنگ سے تیار کی جانے والی دوا کینسر، مرگی اور جوڑوں کے درد سے نجات دلانے میں نمایاں اور مثالی کردار ادا کرے گی۔‘‘ انہوں نے مزید کہا کہ کینیڈا کے تعاون سے CSIR-IIIM جموں کا ’’کینابیس ریسرچ پروجیکٹ‘‘ بھارت کا پہلا پروجیکٹ ہے جس میں برآمدی پیداوار کی بڑی صلاحیت ہے جو ذیابیطس، نیوروپتی، نیورولوجی، کینسر اور مرگی کے لیے معیاری دوا تیار کرتی ہے۔
مرکزی وزیر مملکت کا کہنا ہے کہ ’’آئی آئی آئی ایم اور انڈس سکین کے مابین سائنسی معاہدے پر دستخط نہ صرف جموں و کشمیر بلکہ پورے ہندوستان کے لیے تاریخی معاہدہ ہے۔ اس میں وہ ادویات تیار کرنے کی صلاحیت ہے جو ملک کے اندر اور بیرون ملک برآمد کی جائیں گی۔‘‘ انہوں نے کہا کہ اب یہ منصوبہ جموں و کشمیر میں بڑے پیمانے پر سرمایہ کاری کی حوصلہ افزائی کرے گا۔ ڈاکٹر جتیندر نے مزید کہا کہ CSIR-IIIM، IIM، IIT، AIIMS وغیرہ جیسے اداروں کے درمیان تال میل ضروری ہے۔ انہوں نے ڈی ایس ٹی اور دیگر اسٹیک ہولڈرز کو بھی ہدایت کی کہ وہ ایک ورکشاپ کا اہتمام کریں تاکہ چیلنجز اور مسائل کو موقع پر ہی حل کیا جا سکیں گے۔
سینئر سائنسدان ڈاکٹر پرویندر سنگھ نے بتایا کہ اس دوا کی کیمیائی ساخت جاننے کے لیے کشتواڑ، ڈوڈہ اور ادھم پور وغیرہ سے بیج کے نمونے لائے گئے۔ انسٹی ٹیوٹ کے ڈائریکٹر ڈاکٹر زبیر احمد نے سائنسی تحقیق اور اختراعات کو فروغ دینے میں ڈاکٹر جتیندر سنگھ کے تعاون اور قیادت کی سراہنا کی۔ انہوں نے بھنگ کی تحقیق کے میدان کو آگے بڑھانے میں مرکزی وزیر کی گہری دلچسپی اور سائنسی تحقیق کے لیے ایک قابل عمل ماحول پیدا کرنے کے لیے ان کی مسلسل کوششوں کا بھی اعتراف کیا۔
مزید پڑھیں: Ayush Hospitals In JK پانچ اضلاع میں پچاس بیڈ والے آیوش ہسپتال قائم کئے جائیں گے، منوج سنہا
ڈاکٹر زبیر احمد نے اس پروجیکٹ کو آگے لے جانے اور ضروری وسائل اور مدد فراہم کرنے میں وزیر مملکت کے اہم کردار پر بھی روشنی ڈالی۔ اس موقع پر ایمز کے ڈائریکٹر ڈاکٹر شکتی کمار گپتا، پرنسپل جی ایم سی جموں ڈاکٹر ششی سودن شرما، ایکسائز کمشنر پنکج کمار شرما، ڈائریکٹر جنرل کوڈ شادی لال پنڈتا وغیرہ موجود تھے۔
