جموں کشمیر کی سرمائی دارالحکومت جموں میں کانگریس خواتین ونگ نے رسوئی گیس کی قیمتوں میں مسلسل اضافہ کے خلاف جموں کے پریس کلب میں احتجاج کیا۔
احتجاج میں شامل خواتین کا کہنا تھا کہ اقتدار میں آنے سے قبل بی جے پی کا نعرہ تھا کہ 'بہت ہوئی ڈیزل پٹرول کی مار اب کی بار مودی سرکار' لیکن اب مودی سرکار خاموشی کے ساتھ ڈیزل، پٹرول اور گیس کی قیمتوں میں اضافہ کرنے میں مصروف ہے۔
خواتین مظاہرین کا کہنا ہے کہ ایک طرف کورونا وائرس کے قہر اور اقتصادی بحران سے عوام پریشان ہے تو دوسری جانب پٹرول اور ڈیزل کی قیمتوں میں مسلسل اضافہ ہونے کی وجہ سے عام زندگیاں متاثر ہو رہی ہیں، تاہم سرکار اس کی جانب توجہ نہ دے کر عوام کو مشکالات میں ڈال رہی ہے۔
خواتین نے مرکزی حکومت کو تنقید کا نشانہ بناتے ہوئے کہا ’حکومت غریب عوام کو گیس سلینڈر اس قدر مہنگے قیمتوں پر فروخت کر رہی ہے، جس کو خریدنا غریبوں کی استطاعت سے باہر ہے۔‘
احتجاج میں شامل خواتین نے کہا کہ گیسوں کی قیمتوں میں اضافہ سے اجولا یوجنا کے تحت سلنڈر پانے والے لوگوں کو زیادہ پریشانی ہوگی، اس لیے حکومت کو قیمتوں میں اضافہ کو فوری طور پر واپس لے لینا چاہئے۔
