جموں وکشمیر کے ضلع رامبن میں پولیس نے گزشتہ شب سرینگر سے لاپتہ تین نابالغ لڑکیوں کو برآمد کر کے اہل خانہ کے حوالے کردیا ہے۔
ڈپٹی ایس پی ہیڈکوارٹر رامبن راجندر سنگھ چب نے بتایا کہ اس سلسلے میں رامبن پولیس کو مصدقہ اطلاع موصول ہوئی تھی کہ سرینگر کے بمنہ علاقہ سے لاپتہ ہوئی تین لڑکیاں ایک مسافر بردار گاڑی میں جموں کی جانب سفر کر رہی ہیں۔
راجندر سنگھ چب نے کہا کہ 'پولیس تھانہ بٹوت نے قومی شاہراہ کے ناشری ٹنل کے مقام پر ناکہ لگایا جس کے بعد رات کو تقریباً ایک بجے ایک گاڑی کو روک گیا اور تلاشی کے دوران اس گاڑی میں سوار سات مسافروں میں سے تین لاپتہ لڑکیوں کو برآمد کر لیا گیا۔
اس معاملے میں تھانہ پولیس بمنہ میں گمشدگی کی رپورٹ درج کرائی گئی تھی۔ تاہم آج رامبن پولیس نے تینوں لڑکیوں کو اہل خانہ کے حوالے کر دیا۔
