جموں:جموں و کشمیر کے مشہور ’باوے والی ماتا‘ مندر کی انتظامیہ نے عقیدت مندوں کے لئے ڈریس کوڈ متعارف کرایا ہے جس میں زائرین پر زور دیا گیا ہے کہ وہ مہذب لباس پہنیں، اپنے سر ڈھانپیں اور احاطے میں شارٹس، منی اسکرٹس، پھٹی ہوئی جینز اور کیپری پینٹ پہننے سے گریز کریں۔ یہ ڈریس کوڈ، جموں شہر میں اپنی نوعیت کا پہلا ایسا ضابطہ ہوگا جو مندر کا درشن کرنے کے لئے لازمی قرار دیا گیا۔ جموں کے باہو فورٹ علاقے میں واقع مشہور کالی مندر کے دروازے کے قریب ایک نوٹس اس بارے میں پوسٹ کی گئی ہیں۔
ہندی میں لکھے گئے نوٹس کے مطابق، انتظامیہ کا مقصد مندر کے تقدس کو برقرار رکھنا ہے اور ڈریس کوڈ پر عمل کرنے میں عقیدت مندوں سے تعاون کی اپیل بھی کی گئی ہے۔ مندر انتظامیہ کا کہنا ہے کہ یہ ایک مشورہ ہے۔ مندر میں آنے والے تمام عقیدت مندوں سے گزارش ہے کہ وہ نظم و ضبط پر عمل کریں۔
یہ بھی پڑھیں: Prakash Parv of Guru Har Gobind Singh گرو ہرگوبند کا 355واں جنم دن جوش و خروش کے ساتھ منایا گیا
انہوں نے مزید کہا کہ مندر انتظامیہ نے مندر کے احاطے میں داخل ہوتے وقت ایک مناسب اور روایتی لباس کے ضابطے کی پیروی کی اہمیت پر زور دیا تاکہ زائرین احترام کی علامت کے طور پر مناسب لباس پہنیں اور اپنے سر کو ڈھانپیں۔ مندر کی انتظامیہ نے زائرین کو ڈریس کوڈ کے بارے میں آگاہ کرنے کے لیے گیٹ پر عملے کے کئی ارکان کو تعینات کیا ہے۔
