مرکز کے زیر انتظام جموں کشمیر میں جنوبی کشمیر کے قصبہ اونتی پورہ میں جمعہ کو گرو نانک جی کی یاد میں ایک تقریب کا اہتمام کیا گیا۔
تقریب میں سکھ عقیدت مندوں نے شبد کیرتن اور اکھنڈ پاٹ کا اہتمام کیا جس میں اونتی پورہ کے گردو نواح میں رہنے والے عقیدت مندوں کے علاوہ علاقہ ترال سے بھی آئے ہوئے افراد نے شرکت کی۔
اس موقعے پر مقررین نے گرو نانک جی کی حیات اور انکے کارناموں پر روشنی ڈالی۔
انکے مطابق گرونانک جی نے بلا تفریق رنگ و نسل، مذہب و ملت عوام کو امن اور محبت کا درس دیا۔
واضح رہے کہ 12نومبر کو گرونانک جی کا 550واں یوم پیدائش منایا گیا جس دوران جموں و کشمیر کے تقریبا سبھی گرودواروں میں تقاریب کا اہتمام کیا گیا تھا۔
ترال اور اونتی پورہ قصبہ جات کے کئی مضافاتی دیہات میں سکھوں کی کافی آبادی رہائش پزیر ہے۔ وادی میں گزشتہ تین دہائیوں کے نامساعد حالات کے باوجود سکھ فرقے سے وابستہ لوگ اکثریتی آبادی کے ساتھ مقیم رہے۔
